鄭啟泰向同居女友求婚成功 離職兩個月後重返新城開咪

喺新劇《本尊就位》中飾演五族房鎮警察局局長嘅鄭啟泰，近日在公在私都接連有喜事，先係人生大事，啟泰兩個禮拜前，成功向同居兩年幾嘅女友求婚成功、前速度滾軸溜冰香港代表隊成員王雁芝求婚成功。工作方面，喺1月31號佢就重返之前工作二十幾年，喺兩個月前先離職嘅娘家新城電台開咪。

鄭啟泰送花給馬浚偉。

啟泰非常細心，特別準備咗二十枝紅玫瑰，送給公司嘅女同事，當中包括咁啱嚟到電台受訪嘅歌手蘇家欣、新城知訊台台長程凱欣同女主持黎莉同陳以禔，逐一同大家講聲：「我返嚟喇！」佢又特別走到茶水房，專誠獻花畀負責茶水間嘅姐姐同人事部負責出糧嘅女同事，感謝大家一直幫忙。

鄭啟泰返新城開咪。
當然唔少得送花畀邀請佢回巢嘅馬浚偉，馬仔仲搶先祝賀啟泰求婚成功「 Welcome back！其實你係返屋企。」對於啟泰感謝邀請回巢，馬仔話：「大家都邀請你返屋企，冇人當你離家出走過，你咁任性，浪子。」啟泰坦承自己仲係bad boy，但見過出面嘅世界，發覺娘家係最舒服。

鄭啟泰送花給知訊台主持黎莉。
啟泰第一日開咪，喺節目中第一時間同聽眾們講：「我離家出走，而家返嚟喇！」佢仲同拍檔T-MAX互相鍚面，十分肉緊，啟泰希望能以老帶嫩。 佢又話自己離家出走呢段期間，去過深圳、廣州、橫店拍戲。佢又提到三個禮拜前，馬浚偉叫佢返電台傾偈，當時對方叫佢着返新城件「波衫」，件「波衫」仲係喺佢之前枱面上，望住已經『着咗』20年嘅「波衫」，佢就二話不說着返上身。」佢又話：「今年幾好，返嚟新城大家庭，又返內地拍工作，亦開展新嘅家庭生活，如果大家收到我嘅喜帖，一定要嚟呀。」