MC演靚仔騙徒迷惑懷春名醫 戲中靠手機冧掂影后君如

影后 吳君如 同人氣歌手 MC張天賦 合作嘅愛情喜劇，喺第48屆香港國際電影節舉行首映禮﹐君如繞住MC同 張錦程 、法國演員Noel Norman Rodger Patrick、導演 何妙祺 、監製 陳慶嘉 踏上紅地氈。

電影故事講述君如飾演嘅喪夫婦科名醫，透過交友程式遇上法籍工程師，原來係遇到由MC飾演嘅電騙騙徒。首映禮嘅主持以「懷春」形容君如嘅角色，令佢反應非常大，而MC就笑指作為一個成功騙徒最重要係靚仔，令現場Fans認同尖叫。

傳媒都相當好奇君如同MC相差31歲，喺戲中點樣發展忘年戀，呢日兩人亦揭開神秘嘅面紗，MC透露兩人幾乎零對手戲，佢同君如分別對住手機演戲：「因為好多時冇咩對白﹐都係用手機打字﹐做啲望電話表情，我拍嘅時候都唔係好清楚導演最後會以咩形式表現出嚟。」 

君如亦認同對住手機演戲係其中一個挑戰，而另一個挑戰就係要同新導演合作，由於導演係編劇出身，所以特別要跟足劇本，一向鍾意即場加創作嘅君如都話需要時間適應。

對於有傳今次係君如欽點MC做男主角，佢亦有解繹背後原因：「劇本到我手時監製同導演都問我覺得邊個係時下男神，因為我有去睇MC嘅演唱會，發覺佢就算冇點跳舞都好有感染力，於是向幕後提議搵MC黎演，點知佢真係答應演出。 」

君如嘅丈夫陳可辛同囡囡陳是知都有現身捧場，君如透露就快18歲嘅是知對演藝圈有興趣，希望MC請對方到唱片公司做暑假工，從旁學吓嘢咁話。