福祿壽訓練學院｜復刻曾比特阿Lam合唱超似 人肉變聲器搭老翻林峯加Lowbud大熱贏掌聲

由 阮兆祥 李思捷 王祖藍 主持嘅扮嘢真人Show《福祿壽訓練學院》，噚晚播出第4集。據指節目唔止香港熱播，喺內地亦相當受歡迎，根據CSM媒介研究廣東省收視資料數據顯示，《福祿壽訓練學院》第2同第3集喺廣東省嘅平均收看觀眾人數，先後高踞綜藝類別TOP 1，成績斐然。

呢集Professor Fuk(阮兆祥)、Professor Luk(王祖藍)同Professor Sau(李思捷)三隊首度交鋒，就即時 「復刻經典舞台」進行首回合扮嘢挑戰對決，仲由專業評審 羅冠蘭 同現場觀眾即場評分。

羅冠蘭老師呢日擔任訓練學院嘅評審

首個回合對戰陣容係：福隊祥師兄＋「堆填區小龍女」 趙頌宜(Maggie)復刻莫文蔚喺《2020 年度勁歌金曲頒獎典禮》獻唱《呼吸有害》嘅演出；祿隊「人肉變聲器」湯卓堅＋「老翻林峯」鄭詠謙(Moses)＋「Lowbud大熱」趙亮昭，復刻2022年《聲生不息‧港樂季》中曾比特同林子祥嘅「父子檔」 表演；壽隊葉泓聲(Gordon)＋關嘉敏(Carmen)復刻1984年，張國榮喺《星光熠熠勁爭輝｜嘅「鴛鴦舞王」經典表演。最終祿隊以78分贏得首回合第一名、第二名係74分嘅壽隊，而僅獲73分嘅福隊則排首回答包尾。

祿隊嘅成員除咗扮嘢功夫了得，原來連唱功亦一鳴驚人！Moses、湯卓堅同趙亮昭分別以「爆炸Mike」、「鬍鬚Lam」同「莎莉媽媽」造型獻唱《單車》、《初戀》以及《敢愛敢做，當中不論係Moses定係湯卓堅都「神還原」本尊，湯卓堅一開口已令網民大為驚艷，仲有大量留言指恍如阿 Lam真身親臨現場。

Moses、湯卓堅同趙亮昭嘅演出神還原《聲生不息》演出，佢哋嘅歌喉更係一鳴驚人

而Moses除咗做出阿Mike嘅招牌「一陽指」手勢獲讚小動作做足功課外，獻唱《初戀》期間仲學足阿Mike喪飆高音，同樣獲觀眾大讚，就連出名要求高嘅導師思捷，亦讚不絕口：「三個最似係阿Mo，外貌唱歌同嗰種有啲害羞(嘅感覺)全部出晒。 卓堅我係十分驚喜，你唱林子祥唱得咁好，《敢愛敢做》係佢最難唱其中一首， Good Job！」

至於慘獲第三名福隊嘅表演，其實創意兼「暖意」無限，導師祥師兄除咗親自落場傍實 Maggie，更為佢做足事前準備，就連半夜喺屋企都不厭其煩回應Maggie嘅憂慮同提問。到正式表演時，師徒除咗以同款造型亮相合唱，祥師兄仲搞笑獻唱惡搞版《抽煙有害》，其中「健康冇晒、錢冇晒，戒煙呀Baby」，最後仲將頭上嘅香煙捏碎。

祥師兄就同Maggie合作改編莫文蔚嘅歌曲成為《吸煙有害》

而祖藍同思捷都對祥師兄造型讚不絕口，祖藍話：「祥師兄出嚟，突然之間武則天咁嘅樣，我都醒一醒。」思捷：「加埋嗰五支煙，成個自由神像咁！」至於羅冠蘭就坦言祥師兄嘅出彩反而係表演嘅敗筆：「 Maggie喺前面唱緊， 反而唔及後面嗰股力(指祥師兄）。」不過佢亦讚 Maggie聲音似足原版，又搞笑叮囑話：「扮莫文蔚就真係要減肥喇。」

葉泓聲就同關嘉敏重演84年張國榮嘅經典演出

呢集兩位女主持 郭珮文 (Juliana)同 陳懿德 嘅「奇裝異服」造型亦繼續成為討論焦點，德德嘅「黑面黑板」Jumbo造型更驚艷全場，觀眾亦認為德德嘅「多變造型」幫佢建立特色同風格。思捷則繼續啄住Juliana問：「你係咪收買咗製作組？上次德德已經好慘，今次仲慘到做黑板，但你就做靚靚miss，到底發生咩事？」被殺個措手不及嘅Juliana唔識反應係咁「Er」，德德即幫忙打圓場，不過卻遭思捷喊停而Juliana以一句KO思捷話：「其實Professor Sau，你係咪嬲我呀？」思捷亦醒目接招回應話：「我哋依家做緊節目，我嬲唔嬲你完全無關。」精彩對答贏得全場掌聲。

呢集德德慘變黑板，真係幾乎見佢唔到Juliana仲以近日熱爆金句回應思捷

《福祿壽訓練學院》星期日晚 20:30 翡翠台