公屋單位 | 女兒私下購私樓 婆婆不知情被房署查出迫遷

一名男網民日前在網上討論區「連登」以「最近做義工探訪一個獨居老人，原來佢畀房署迫遷，要2個月內搬離公屋」為題發文，表示「打擊富戶我明白，但問題人哋係咪富戶先」。

房屋署要求2月搬走

事主透露一名年約65至70歲的婆婆，一家7口居住大窩口邨一個約300呎單位數十年，3名子女先後搬走，丈夫離世後，只剩一名女兒同住，惟女兒「情緒異常」，與婆婆關係「勢成水火」，不但沒有贍養和照顧婆婆，她作為單位登記人之一，去年初更私下買樓，卻沒有通知婆婆，結果被房屋署查出，要求婆婆在2月底搬離單位。

（網上圖片）

單位充斥物品惹床蝨

事主稱明白房屋署要打擊富戶濫用公屋，但強調婆婆對女兒買樓並不知情，「畀自己個衰女包過一戙」，而且時間緊迫，應先安排公屋銜接才要求婆婆搬離單位，或是保留原有單位，「若無法保留原單位，都係咪應該換番一個單人公屋畀婆婆？點解冇啦啦就踢人走？要老人家重新排期？排到幾時先？時間緊迫，2月底就要搬走，面對屋內30幾年嘅物品，部分囤積物品，同阿女購物狂引致海量衣物，有床蝨，不聞不問，我都唔知老人家可以點清空」。

網民不同情：規矩係咁

帖文曝光後，不少網民卻不同情婆婆的處境，甚至質疑有虛假陳述之嫌，「首先有潛在虛假陳述嘅問題，如果家庭成員申報過冇其他物業嘅話，個個畀人發現咗就話自己幾慘幾慘，咁咩樓都唔使收啦。第二，阿婆唔知道個女有物業，只係畀人過一戙，同法官講囉睇吓佢信唔信，分分鐘阿婆有份畀首期」、「規矩係咁，都係無法，個個都話唔知都搞唔掂，不過一般嚟講都好少會搞老人」、「個女買咗樓唔使坐都賺咗啦，仲想要留住間屋，一個人住300幾呎，用嚟擺咁多衫，畀你重新排期仲想點」、「淨係睇到慘嘅一面，就可憐佢，可唔可以客觀啲呀。就算大陸人濫用公屋，都應該一單還一單啩」。

面對網民質疑，事主回應自己只是「義工」，幫手執屋和滅蟲，不是社工，不知道對方身家，但形容婆婆生活十分簡樸，沒有「賣慘」，只是對婆婆的故事感到「心悒」，才在網上發文求助，「我次次上去都係見到佢食白粥，然後人哋送嘅湯包、冬菇，都係咁塞畀我，自己都唔捨得食，走去送畀人嗰啲人。係今次得知呢單嘢有啲心悒OK？佢個女私下買物業，都係話呢間屋唔合符資格，但佢老人家本身係合符資格，冇啦啦趕人走，30幾年嘅嘢搬得去邊度」。

事主續說，已上過該單位5、6次，強調婆婆沒有「瞞報」，「我fact check過我先想幫吓（婆婆）」。他又指已代婆婆向區議員求助。

（網上圖片）

【延伸閱讀】

房署揭兒子擁私樓單位🏘️ 媽媽遭取消居屋申請憂失公屋兼被告

濫用公屋 | 戶主移民加拿大公屋讓兄長 家訪回港扮住10分鐘 港女力數6宗罪向房署舉報

公屋上樓 | 獲派健明邨如中頭獎🏘️ 房署一個原因不准簽約兩母子憂瞓街