有種好男人｜徐榮拋愛情金句冧女　楊卓娜淚崩街頭感尷尬

《有種好男人》上周五（13日）晚一集劇情說到，「渣男」賴Sir（歐瑞偉飾）一直利用保安公司行政部經理娜姐（楊卓娜飾）對其傾慕之情攞着數，賴Sir終被揭發搭上娜姐下屬Macy（張詩欣飾），「個心穿咗個窿」的娜姐瞬間崩潰，坐在馬路上放聲痛哭，我見猶憐；此時，夏中秋（徐榮飾）化身「暖男」給予安慰，不甘輸給「後生女」的娜姐向對方大吐苦水：「我為佢付出咗咁多，到頭來乜都冇，好唔甘心呀……」中秋隨即大拋警世金句：「唔放手咪仲嘥時間」、「腦明白係一回事，個心接受係另一回事」、「最緊要做咗啱嘅決定，其他嘅嘢交畀時間啦」，落力氹女方開心之餘，更出頭寸爆賴Sir，最後成功將娜姐「私有化」。

劇中情路崎嶇，現實中楊卓娜卻是一名「幸福繼母」，她與「廣告燈箱大王」楊志翹相愛十多年，人前人後依舊恩愛甜蜜。卓娜稱未遇過「渣男」，但坦言自己過去曾跟「娜姐」一樣執着：「以前我會為堅持而堅持，我好認同中秋所講『唔放手咪仲嘥時間』。」談到拍攝淚崩街頭一幕，卓娜表示最困難是穿高跟鞋行斜路：「我未試過喺條街放聲大哭，好尷尬，但咁做任性得嚟又好過癮，好宣洩到情緒。」