頭場演唱會片段重溫｜Twins紅館個唱開鑼 招牌「經典側手翻」引爆回憶全場大合唱！

「孖妹」Twins假紅館展開14場《TWINS SPIRIT SINCE 2001 LIVE IN HONG KONG》演唱會，日前正式開鑼，蔡卓妍、鍾欣潼狀態大勇，又跳又唱，「經典側手翻」招牌動作重現舞台，首首代表作歌曲，無敵回憶殺帶領全場一萬二千歌迷由頭大合唱到尾，歡呼聲掌聲震裂紅館。而一班英皇藝人歌手，總動員幫Twins拍攝過場片，眾人發揮「扮嘢」一面，惡搞「鐵達尼」、「Barbie」、「明日戰記」等電影場口，溫馨又搞笑。

Twins兩人於opening披上拳賽戰衣神祕突襲現身，全場即嗌爆，拿走戰袍，以全身粉紅色裝扮登場，Opening的快歌Medley，唱出一系列經典代表作，包括有：《高手看招》、《明愛暗戀補習社》、《二人世界盃》、《愛情當入樽》、《ICHIBAN興奮》、《盲頭烏蠅》等，觀眾已經企晒起身跳舞，氣氛高脹，當蔡卓妍（阿Sa）和鍾欣潼（阿嬌）演唱《跅跅步哈姆太郎》時重現初出道招牌側手翻動作，全場氣氛升到爆點，叫聲掌聲震裂紅館。

Twins在演唱會上，笑言自己是一個奇蹟，阿SA(蔡卓妍)台上說：「22年我地出道左四百日，就開我哋第一個紅館演唱會，嗰時係一個奇蹟，估唔到今日出道22年仲可以開演唱會，亦都係一個奇蹟。」鍾欣潼（阿嬌）：「作為組合仲可以一齊咁耐真係好難得，好多時其他組合突然鬧交，有或者有更好發展，慢慢比人淡忘，我地都唔知幾時係我哋最後一次開演唱會。」

阿SA繼續說：「你哋知啦，我哋兩個年紀愈來愈大，唔係以前𡃁妹仔，所以每一次都好珍惜，每一次都唔知係咪我哋最後一次。」阿嬌: 「無論點都好，好多謝每一位陪伴我哋長嘅朋友，好多人話我哋代表佢地青春，但係你哋都代表我哋嘅青春呀。」

全場大合唱《下一站天后》之後，阿嬌和阿Sa分別在台上說出感謝對方的話，阿Sa閃著淚光向阿嬌說：「22年前完全唔會想像到，呢個就係我哋嘅將來，雖然途中有好多大大少少障礙，從淚光之中走到這個年紀，但係我知道無論係開心定唔開心，係人生高光時刻，定係低潮時期...我哋終於從一個階段走到另一個階段，但係無論邊個階段，我知道你都會同我一齊，多謝你呀鍾欣嬌。」

阿嬌多次抹淚:「由細到大我都唔係一個自信嘅人，好多時遇到困難，我都會逃避，但係你就會走出來幫我解決，幫我出頭，支持我，有你係我身邊，你嘅自信，你嘅開朗係我學習嘅對象，我以前成日做嘢都半途而廢，唯一我冇放棄就係我哋嘅友誼，係維持得最長。我好幸運好感恩，可以遇見你，可以同你組成twins ，多謝你呀蔡卓妍。」 之後她們唱《相愛22年》時也淚灑現場。

演唱會頭場適逢是阿嬌正日生日，阿Sa悉心準備為阿嬌慶生，她呼籲全場歌迷在凳底拎起海報，並舉起齊齊向阿嬌說生日快樂兼唱生日歌，結果因為有歌迷向最前面行衝，不在坐位中，又有人把海報的顏色互相調亂，破壞了阿Sa原本的計劃，沒有辦法統一生日快樂字句畫面，阿SA搞笑道，「哎呀，我真係畀你哋激死，呢單嘢我搞左好耐，我嘅慨念圖係好靚㗎，依家變左抽象派啦。」阿嬌笑住話，「唔緊要啦，心意我收到晒啦。多謝大家。」

演唱會尾聲，Twins以經典歌曲《風箏與風》為頭場演唱會完美落幕。

Twins紅館個唱開鑼 引爆回憶首首全場大合唱！Twins紅館個唱開鑼 引爆回憶首首全場大合唱！孖妹「相愛22年」，唔容易呀!