薛家燕難接受顏國樑離世 讚揚好友角色「全海景」深入民心

薛家燕呢日為品牌擔任社區活動大使，74歲家燕姐都係長者之一，唔只注重自己身體狀況，佢更將心比己關注長者狀況，家燕姐指香港人生活繁忙，有時忽略身體健康。

家燕姐目前生活盡量養生保持體魄，嚟緊為拍攝電影作準備，家燕姐將前往馬來西亞開工飾演特務角色，更要拍動作場面，又同小鮮肉做對手戲，又要記對白，家燕姐亦有留意伍允龍喺新片嘅演技，笑言希望搵伍允龍做武術指導。

家燕姐早前同孫仔喺新加坡登台兼旅遊，笑指3歲孫仔近日問幾時再登台，因為孫仔好享受喺台上表演，家燕姐覺得孫仔有遺傳表演基因，家燕姐指自己細個都好鍾意表演。談及資深演員顏國樑日前離世，家燕姐與顏國樑多次合作，一時之間好難接受好友離開，家燕姐讚好友顏國樑演過嘅角色深入民心，包括《十月初五的月光》海景叔、《真情》陳大勝、《皆大歡喜》石大川等。