譚輝智父子受訪分享相處之道 FC目標確切盼代表作傳頌

譚輝智 同爸爸 譚握籌 喺父親節前夕接受香港電台《舊日的足跡》訪問，分享父子相處間嘅小故事。譚爸爸被問及成為星爸嘅感受時話，見到FC唱歌嘅滿足感已經足夠：「做爸爸就係希望子女開心，又唔係急住要佢賺錢養家。」而輝智強調爸爸對自己影響甚深，特別係待人接物一面：「爸爸經常教導我哋要對別人禮讓，抱呢個態度待人，不論對發展友誼同事業都有所得着。」

輝智同爸爸譚握籌一齊接受車淑梅嘅電台節目訪問

輝智當時喺決實選唱《記憶棉》，有人指係讓賽以免妨礙生意同家庭，呢日佢就話：「我估計自己三甲不入，得亞軍已經超乎想像。古淖文唱《Feeling Good》，我唱乜都唔會贏，其實我想選唱陳奕迅嘅《大個女》，純粹希望送俾囡囡留念，不過可能成績會更差。」

FC參賽時選唱《記憶綿》有指係讓賽

仍未習慣成為公眾人物嘅佢，又指會時刻儆醒自己。譚爸爸亦提點佢要有心理準備面對好同壞消息。FC仲話拉姑亦有俾唔少意見：「拉姑教我點準備唱歌、運用聲線，佢有好多秘方。其實我都唔知拉姑點解鍾意我，佢知道我喉嚨痛就會俾啲補品我，我感覺好幸福。」

拉姑成為FC嘅頭號Fans

FC正式式成為歌手，仲渴望同天王合作。「我係張學友嘅Fans，如果見到佢我會暈。我聽佢嘅歌成長，佢所有歌曲我都鍾意，每一首都會聽好多次。仲有陳奕迅，我好鍾意佢後期嘅作品，好有深度。女歌手方面我欣賞容祖兒，覺得佢好厲害，聲底好厚好勁。」

圓夢之後，FC亦已經定立下一個目標：「下一個夢係有自己嘅代表作，大家一聽就知道係我嘅歌，呢個係我目前唯一目標。」而譚爸爸亦忠告話：「做人要有目標，不過唔好家得太高，否則每日都會失望。要顧及健康，以樂觀嘅態度解決問題。身為公眾人物，擁有多咗煩惱自然會多，無可能完全解決，自己心中唔當佢一回事，咁就已經解決喇。」

父子檔早前參與慈善節目同台演出

譚爸爸又笑指父親節會留待子女安排節目：「佢哋最鍾意唱《真的愛你》，輝智喺英國讀廣告設計，多年來都會親手整賀卡，兄妹簽名寫上幾句說話送俾我。我一張一張包好，幾十年咩都可以拋棄，唯有呢啲卡我唔捨得，而家始收藏7個孫送嘅卡當做寶！」