海關戰線丨張學友挑戰連場高難度動作戲 獲謝霆鋒大讚身手敏捷

由謝霆鋒擔任動作指導及領銜主演，張學友、林嘉欣、劉雅瑟領銜主演，吳鎮宇特別演出嘅電影《海關戰線》即將喺本周五（5號）上映。已經有一段時間冇拍戲嘅學友呢次唔只要應付大量文戲，更要挑戰霆鋒為佢精心設計嘅連場動作場面，對體能真係一個好大考驗。
 
學友挑戰連場動作場面，絕對係體能大考驗。

學友首日入組已經要拍攝槍戰場面，為確保安全同演出水準，學友喺正式開拍前認真向在場嘅槍械同爆破老師，了解開槍、揸槍同走位等動作，埋位前亦同動作指導來回練習，令霆鋒都對呢位前輩嘅專業同用心大感佩服：「學友哥嘅動作其實都好敏捷，你睇佢跪低再爬起身開槍嘅連環動作好爽，只係佢不似我地經常拍打戲，所以一定要warm up，但好快上手。」
 
學友喺正式開拍前認真向在場嘅槍械同爆破老師，了解開槍、揸槍同走位等動作。

電影喺疫情期間拍攝，加上氣溫熾熱，學友既要著住全套海關制服、排戲時又要戴住口罩，令佢都感到份外吃力，需要不時飲水降温以免中暑。學友對自己演出亦非常嚴謹，每拍完一take就會問霆鋒同導演覺得自己表現如何？

電影喺疫情期間拍攝，加上氣溫熾熱，學友既要著住全套海關制服、排戲時又要戴住口罩，令佢都感到份外吃力。

鬼馬嘅霆鋒就話：「唔駛擔心，將你嘅動作加快三格（所指影片速度）就冇問題！」鬆一口氣嘅學友就話：「可以加快三格？不過我以後都係拍喜劇好啲，輕鬆得多！」事後霆鋒指學友動作步伐係冇問題嘅，只係佢要求太高而已，而一直企喺機器組旁邊「睇戲」嘅衛詩雅，現場直擊學友哥身手後都拍手叫好。
 
學友透露今次文戲同武戲都好平均，兩者都極具挑戰，亦慶幸遇上霆鋒同林嘉欣兩位專業對手。

學友透露今次文戲同武戲都好平均，兩者都極具挑戰，亦慶幸遇上霆鋒同林嘉欣兩位專業對手，令佢好快投入同完成每一場戲。學友就話：「打打殺殺當然落喺霆鋒身上啦，但佢呢位動作指導真係好稱職，好有心思設計同指導我每個動作演出，令我覺得自己真係身手不凡。至於嘉欣嘅對戲就繼續好有默契，自己有好幾場內心戲都要花時間醖釀情緒，因為戲中角色是一個比較黑暗嘅人，對我嚟講係一次高難度挑戰，當完成一刻真係好滿足同鬆一口氣！」
霆鋒對學友嘅專業同用心大感佩服。