劉青雲爆英文名Sean由來 楊偉倫被封信二自嘲貞子面孔

劉青雲、周文健、顏卓靈、楊偉倫及導演邱禮濤，呢日現身戲院謝票，並公布票房破千萬嘅喜訊，相隔31年再同Michael合作嘅青雲，透露自己嘅英文名Sean原來係Michael當年幫佢改架，Michael仲比咗三個相同讀音但唔同串法嘅英文名，最後青雲就揀咗Sean並一直沿用至今。

講起當年兩人合作趣事，Michael就話當年無被青雲整蠱，反而就成日被佢拍胸口，青雲話Michael份人無論戲裡戲外都係咁搞笑，Cherry話對住佢兩個都要忍笑。而講到今次有機會同影帝青雲合作，Cherry都話自己都被對手電親，仲話有時早收工，佢都會特登留喺片場，睇青雲做戲從中偷師。

而因為髮型被指似「信一」劉俊謙嘅阿倫，無端端被網友封為「信二」，佢都有啲喜出望外，佢話自己本身一直覺得呢個髮型好襯自己，但而家都係唔敢諗咁多，被問到除咗髮型之外，最想似劉俊謙咩？佢就搞笑話「我諗好多男士都想似佢，佢嗰個咁精緻嘅面孔，而自己就係「貞子」嘅面孔，係兩回事，令身旁嘅拍檔都笑唔住大笑。至於Cherry戲中90年代嘅造型，就被指似日本女星酒井法子，Cherry表示覺得好榮幸同埋好開心，而身旁嘅阿倫，就爆咗一句係走佬法子，令Cherry大惑不解，不過，佢就提議可以考慮成為下一部電影嘅戲名。