拍檔廚房｜黃翠如 蕭正楠放閃無極限 滕麗名為奄尖老公苦練廚藝

蕭正楠、滕麗名喺綜藝節目《拍檔廚房》分別夥拍90後廚師比併廚藝，最終阿蕭以一分險勝阿滕。作為主持之一嘅黃翠如，雖然話就話係為阿滕打氣，不過翠如就被自己一對眼出賣咗！事關翠如嘅目光全程落喺老公身上，就連喺賽後訪問都繼續放閃：「我嫁畀佢就係因為佢型，冇其他嘢㗎喇！」𠱁到阿蕭不知幾開心，令大家都畀佢哋兩個閃親！
 
阿滕雖然輸咗，不過佢嘅「五分鐘速煮」就成為唯一一個拎滿分嘅藝人。成為人妻後嘅阿滕，為咗滿足食得奄尖嘅老公亦積極苦練廚藝。阿滕大爆老公喺飲食上非常挑剔，唔好食係會𦧲返出嚟。更試過為整天婦羅畀老公食，要顧住油溫又要顧住食物口感，最終自己要拎把梯坐喺爐前睇實，真係唔容易！

雖然阿蕭都係「一家之煮」，不過佢就話好彩老婆未到咁嚴格嘅程度，就算自己煮生嘅老婆都唔會Say no！
 
另一位主持方力申雖然未成家立室，不過同女友感情甜蜜。而小方面對另一半親自下廚，要點樣畀出評價亦相當有方法！就係唔理三七廿一極速食完，再快快讚賞對方。

《拍檔廚房》逢星期一至三 22:30 翡翠台播映