囡囡生父被爆係黃子華司機 陳彥行發文轟被友人出賣

日前有指47歲嘅陳彥行（行姐），育有一名3歲女兒，並且喺港島區一間名幼就讀，相隔2日後，行姐喺社交平台發文，承認自己的確已為人母，並指「3年前就應該公佈這個喜訊」，但由於嗰段日子，發生咗好多事情，所以都無呢個心思同大家報喜。
陳彥行發文指自己被出賣。
至於囡囡嘅爸爸係邊位？行姐就表示另一半係一位簡單低調嘅圈外人，無咩特別，不過有傳媒就透過行姐嘅朋友收到風，話呢位圈外人其實係黃子華嘅司機，當年子華曾經同行姐合作過劇集《男親女愛》，唔知係咪因此令子華有機會做媒人，為兩人牽紅線。
行姐早前被爆秘密誕下一名女兒。
友人又爆另一半對行姐照顧周到管接管送，報道出街後，行姐又係社交平台發文寫道：「人與人之間已經沒有什麼信任可言了，認識了20年的朋友也會出賣你，人生又上了一堂課。」似係因為被某友人爆咗另一半嘅身份，而令行姐大動肝火，有唔少網民更留言猜測，呢位咁口疏嘅20年朋友究竟係邊位？