獨家丨關曜儁二度榮升爸爸 BB出世撞正江旻憓奧運奪金

恭喜恭喜，關曜儁Leo同老婆楊韻璇Twinkle再添丁，喺踏入7月28凌晨三點幾順產誕下囝囝，兩夫妻喺舊年3月誕下女兒關凱妃Lorraine後，如今湊夠一個好字。再為人父嘅Leo急不昅待同我哋分享喜悅，由於BB仔出細一刻撞正香港世一運動員江旻憓Vivian喺巴黎奧運出戰女子重劍個人賽決賽，歷史性奪金一刻，呢個雙重喜悅令佢兩公婆超級難忘，當下好大感受：「當全香港支持女重劍奧運冠軍，而我就喺產房支持緊我老婆，我老婆就係我心目中冠軍。」
關曜儁嘅B仔喺邊28號凌晨出世。
Leo透過語音分享驚險又難忘嘅晚上，喺27號開廠工作至晚上十一點幾才返家，本來同老婆仲諗住睇凌晨江旻憓出戰，點知一點幾時老婆開始作動，於是喺兩點四十分就出門口去醫院，老婆到達醫院後還未趕及打無痛分娩就要入產房，Leo陪伴在側見到老婆當時已痛到叫到拆晒天，更搞笑形容有一刻好似覺得驅魔人一樣，老婆一邊摙實佢隻手，佢一邊作出安慰，爆老婆平日係超級怕痛嘅人，喺產房裡面姑娘鼓勵佢點樣呼吸，但老婆好似完全聽唔到，Leo都好緊張，大大聲進行引導呼吸唞氣節奏，結果過程大約五分鐘就順利生咗BB，見證呢個過程，Leo話：「雖然我講得有啲搞笑，見到老婆好痛，母親真係好偉大，亦係好好經歷，感受到一家人嘅愛。」
B仔出世一刻撞正江旻憓奪金。
身兼健身教練嘅Leo不時都會將運動融入家中，同年紀小小嘅大女Lorraine都會一齊互動，認為呢方面係家人連結之一，亦有益身心。講到BB出生一刻撞正江旻憓奪金，唔通有所啟示，Leo有感而發：「唔通阿仔第日都會世界冠軍？人生要創造目標，唔通阿仔都會成為一啲嘢嘅世界第一。」另外又透靈大女出生時喊得好緊要，好似辣妹一樣，反而細佬比較平靜，面對呢啲三歲定八十嘅性格，Leo已擔心定姐姐會蝦細佬。
Leo囡囡今年3月17號一歲生日。
Leo喺下月就會踏入31歲生日，相信呢份係上天給佢最好嘅禮物，Leo一直努力拍劇兼做健身教練養家，早前喺劇集《神耆小子》中飾演搞笑角色黃財進頗有發機會，日前又剛剛現身主演新劇《武林》煞科。

Leo話而家湊夠一個好字好感恩呀！