巴黎奧運直擊丨黃翠如被安排上鐵架做直播 畏高崩潰爆喊 獲方力申陪伴安慰

巴黎奧運開幕禮於香港時間7月27號凌晨1點30分舉行，樂壇天后Lady Gaga為表演打開序幕，而患上罕見病「僵硬人症候群」、被迫休養多時嘅加拿大歌后Celine Dion亦復出獻唱，今屆巴黎奧運正式展開，全部比賽共有32個項目，共產生329面金牌。

Celine Dion無懼病患，冒雨為巴黎奧運開幕禮壓軸獻唱。2024巴黎奧運開幕式，Lady Gaga喺塞納河畔表演揭開序幕。

TVB「特派專員」及攝製隊不辭勞苦為大家直擊，拎咗好重嘅攝影器材，除咗面對突發封路，有時要排個幾鐘嘅隊先可以進場。

港隊今次巴黎奧運合共派出35運動員出戰13個奧運項目，其中「香港劍神」張家朗及「混血女飛魚」何詩蓓代表港隊擔任開幕禮旗手，TVB「特派專員」方力申及黃翠如凌晨喺當地準備做直播，疑與當地工作人員溝通出現誤會，翠如竟然被帶到一個好高嘅鐵架前面，當地工作人員指示要佢爬上一個比觀眾看台更高嘅鐵架上進行拍攝。

疑與當地工作人員溝通出現誤會，翠如竟然被帶到一個好高嘅鐵架前面。

片中見翠如流出大大滴眼淚，小方雖然拎住機拍攝，不過佢亦鼓勵翠如試吓，亦主動陪伴翠如一齊行，又指翠如仲有一個鐘就要出鏡，安慰翠如唔好喊。翠如本身有畏高，頓時感到好驚，忍唔住喊咗出嚟，希望抒發緊張嘅情緒，等自己可以完成挑戰，幸好最終經過跟當地工作人員再度溝通後，翠如成功去另一個位置，跟香港主持進行直播chitchat。
片中見翠如流出大大滴眼淚，小方雖然拎住機拍攝，不過佢亦鼓勵翠如試吓，亦主動陪伴翠如一齊行。