詹天文落力綵排準備驚喜 黃奕斌期待張馳豪公眾地方脫衣

施匡翹 邢慧敏 葉靖儀 等為設計師Vivienne Tam 舉辧嘅婚嫁系列行騷，著上融合東西文化嘅穿搭現身展現魅力。 車婉婉 張馳豪 黃奕斌(Hugo) 詹天文 馬詩慧 王麗嘉 兩母女等都以獨特嘅打扮嚟睇騷支持。

Aska日前黑仔遇上座駕爆呔，赤膊上陣好Man咁喺烈日當空下換呔，網民見到佢一身肌肉都睇到嘩嘩聲，Aska都有解釋返呢個情節，話因為一身衣著係要緊接下一個訪問，唔想令上衣濕透一身汗，而且見咁好天氣就當曬吓太陽上色，而換呔地點係一個私人地方，身邊嘅Hugo即大讚Aska好性感，下次可以考慮喺公眾地方剝衫換呔，令Aska要清澄重點唔係「脫」，只係得一件衫唔想濕住去做訪問，所以唔理身材如何，當下都會除衫。不過點都好啦，事實證明呢一脫係好受粉絲們歡迎。

Windy以一身旗袍亮相，展現中國娃娃魅力。Windy雖然正等待放榜，但因為稍後將會同鍾柔美(Yumi)、姚焯菲(Chantel)合體開騷，所以完全冇時間去畢業旅行，正踏入綵排階段，佢預告演唱會上除咗歌舞演出，仲會有驚喜呈現，叫大家可以估吓內容。而佢喺開騷前會有新歌推出，挑戰Rap嘅界限。

邢慧敏未入行前已經係模特兒，行騷對佢嚟講絕對駕輕就熟，令佢回憶湧現，雖然佢已經有一段時間冇行騷，幸好早前拍攝綜藝節目令佢可以重踏天橋，所以覺得表現一啲都唔陌生，不過行婚紗騷佢就係第一次。