2024香港小姐競選｜初步入圍佳麗特備節目現身 自我介紹爭取您投選一票

經過兩輪面試之後，《2024香港小姐競選》，已經有25位準佳麗初步入圍，而特備節目《2024香港小姐競選 誰是入圍者》今晚就會喺翡翠台播出。今屆競選亦正式投入密鑼緊鼓籌備階段，而25位初步入圍佳麗，分別係(排名不分先後) 陳紫佟、陳甜甜、陳元元、鄭芷瑤、張萃琳、程姜月、莊曉婷、鍾翠詩、方思敏、黃詩莹、郭恩程、梁嘉莹、李曼思、林瀾、盧凱怡、馬儷文、馬嘉聰、倪樂琳、秦冀雯、謝淑怡、黃劍萍、王汛文、吳芷靖、楊梓瑤同俞可程。

為幫助觀眾投選今屆港姐競選正式候選佳麗前，對眾佳麗更有所認識， TVB 特別製作《誰是入圍者》節目，介紹各位佳麗特色，節目將25位佳麗分成「海外佳麗組」 、「年輕/成熟組」、「翻版撞樣組」、「專業人士組」、「才藝技能組」同「選美經驗組」6大組別，當中包括25位佳麗自我介紹，亦加插佢哋接受面試同個人才藝表演等唔同片段。

今屆初步入圍嘅佳麗，其中一個最大特色係撞樣唔少女藝人，更喺網上引發熱烈討論。節目組亦打正旗號將其中4位佳麗歸類為「翻版撞樣組」，佢哋分別係「城大李嘉欣」倪樂琳、「銀行界李施嬅」林瀾、「翻版蔡潔」程姜月，同埋「河北黃婉佩（Race@2R）」陳甜甜。

當中最受矚目，可以話係由面試開始已雄霸唔少傳媒版面嘅倪樂琳Ellyn。Ellyn係城大畢業生，亦坦言喜歡幕前工作： 「我好鍾意表演，我好鍾意接觸觀眾，亦都好鍾意將正能量帶畀人。」佢又指唔介意同時感恩被封為「城大校花」同被讚撞樣李嘉欣，但仍希望憑自己實力令大家記得：「我想大家唔係因為我似邊個而記住我，而係因為我係我，而記得我同欣賞我。」

倪樂琳被稱為「城大李嘉欣」

熱度唔比Ellyn少嘅仲有「翻版蔡潔」程姜月Dolores ，喺浸會大學修讀中國研究嘅佢，喺節目中呈現嘅才藝表演，亦係類似藝術體操加上雜技嘅表演，加上樣子帶古典美，氣質不凡。 身為社企老闆之一嘅佢，笑言係因獲街坊肯定同鼓勵，先有勇氣參選港姐。而對被指撞樣蔡潔，Dolores一樣大方回應。

「翻版蔡潔」程姜月

今屆有人年紀細細就決定參選，好似25人中年紀最輕、現年17歲嘅鄭芷瑤，仲有18歲嘅陳紫佟。鄭芷瑤Yoyo係一位中五學生，對於成為年紀最輕嘅參賽者，Yoyo直言緊張，不過仍不忘力Sell青春優勢為自己打氣： 「我雖然學歷同經驗都唔夠其他參賽者，但我覺得自己嘅青春同活力可以感染更多人！」

今屆參選年紀最輕、只得17歲嘅鄭芷瑤

而陳紫佟Jessie係第二名年紀最輕嘅初選入圍佳麗，剛考畢DSE嘅佢透露媽媽早年亦曾參選港姐，今次參加更帶住為媽媽圓夢嘅意思，相當有意義，佢話： 「我媽咪都參加過香港小姐，仲入圍15強，但因為佢(嗰時)要去留學冇參加到決賽，今次(我)參加香港小姐係想填補佢呢個遺憾。」

陳紫佟嘅媽咪當年曾入圍15強，今次佢參選想代媽咪圓夢

今屆港姐唔止平均學歷高、亦包括大量專業人士，其中李曼思、莊曉婷、俞可程、方思敏同陳元元就被歸入「專業人士組」。方思敏Mandy更係一位時裝設計師，仲擁有自己嘅服裝品牌，佢喺節目中提議港姐除穿著泳裝同旗袍外，亦可考慮加入潮流元素： 「型格嘅牛仔褲或者 Corset束胸衣最近都好興，可以著到性感同型格出嚟。」Mandy喺節目仲展示Corset穿搭大法 ，健康性感中見型格。

方思敏以自家作品束衣參與面試

至於李曼思Adria就係一位城市規劃師，佢嘅花式溜冰亦相當耍家！其實今屆港姐絕對可以話卧虎藏龍，除咗早前公布過嘅鋼琴家、仲有國標舞排名世界前三名嘅代表，記得留意今晚播出嘅節目，對25位初入入圍佳麗作更深入全面了解喇。

李曼思可以話係文武雙存

特備節目《2024香港小姐競選 誰是入圍者》今晚(7月7號) 22:30 翡翠台

《誰是入圍者》已接受網上投票 https://tvb.app.do/misshk24 每日只可投票一次、每次最多可投5票，7月10號 12:00 截止