2024香港小姐旅遊記｜15位候選佳麗兵分五路探訪 上天下海展露個性一面

年度盛事《2024香港小姐競選》決賽將會喺9月15號舉行，早前15位候選佳麗就兵分五路，由11位藝員帶領下分別去到內蒙古、塞班島、新加坡、菲律賓碧瑤，以及留喺香港進行親善之旅。五組佳麗嘅親善之旅內容，將會喺節目《2024香港小姐旅遊記》播出，大家密切留意下星期一（26號）晚上10點35分翡翠台，而各位網民亦可上網為心水佳麗投票。
眾候選佳麗聯同嘉賓們出席記招。
其中塞班島中相當豐富，佳麗們唔只要水著上陣親親魔鬼魚，仲有得揸飛機，簡直係上天下海。隨團出發嘅馮盈盈就笑言一切濕濕碎，但最令佢覺得遺憾嘅係同靚仔飛機師無緣，反而麥美恩（Mayanne）就大飽眼福。至於12號佳麗鍾翠詩就話，好深刻同Mayanne喺玩賽車時講咗好多心事，又大讚Mayanne駕駛技術好好。
隨團出發嘅馮盈盈笑指親親魔鬼魚只係濕濕碎。
江美儀同邵初帶隊去新加坡，隊中有今屆年紀最細嘅佳麗1號陳紫佟（Jessie），大家都對佢特別照顧。但美儀姐就收到一個特別任務，就係要整喊嘅佳麗們，令佢非常頭痕，但美儀姐最後都用咗一番肺腑之言令佳麗們爆喊。呢日美儀姐就大讚Jessie進步唔少，Jessie都好謙咁講：「有壓力先會有進步。」
江美儀話接到特別任務要搞喊佳麗們。
何沛珈、陳懿德呢次就帶隊到內蒙古體驗當地文化，但最令佢地感到難忘嘅，就係要喺大草原上解決大小二便，而解手期間更要小心避開牛、羊嘅排泄物。15號俞可程就話，睇到節目預告時忍唔住眼濕濕，但其實兩位師姐先係最喊得嘅人。
何沛珈同陳懿德難忘要喺大草原上解決大小二便。
佳麗們唔只體驗各個到訪地嘅地方文化，為貼合今屆「Proud To Be A Woman」及「絕美多樣」口號，佢地更有拜訪當地傑出女性代表，親身對話取經。而拜訪菲律賓碧瑤嘅小隊，除咗同一位當地歌手切磋歌藝，更同一位跨性別選美冠軍見面，作為師姐嘅彭慧中都大讚三位師妹叻女口才好，幾乎冇NG優秀。
彭慧中大讚三位師妹叻女口才好。
留喺香港嘅佳麗亦同樣有好新鮮刺激嘅體驗，包括吊威也、化大戲妝化身小生花旦，14號楊梓瑤就好難忘體驗化吊眉妝；11號梁嘉莹就話，以前覺得吊威也好有趣，結果親身上陣後自己反應非常大。