鄭秀文霸氣登紅館開演唱會 含淚感激粉絲久等一年無退票

鄭秀文 去年因為確診新冠，演唱會亦無奈要延期補場，相隔接近一年，Sammi終於回歸紅館舉行13場演唱會喇。首場演出全場座無虛席，唔少圈中朋友除咗送上花籃祝Sammi演出順利之外，鍾楚紅、甘比同細女、蘇永康同太太、許鞍華、釗峰同Nowhere Boys、林建岳及女友等都有到場欣賞。

再踏紅館舞台嘅Sammi，狀態大勇，佢以裝甲造型乘坐機械人，並以歌曲《朝聖》霸氣登場，演唱《發熱發亮》後，Sammi感謝觀眾365日嘅等待：「首先多謝你哋對我嘅包容，攞住門票，呆等咗一年，好多謝你哋，多謝你哋冇選擇退票，繼續支持我。你哋將會睇到一個好精彩嘅演唱會。」

之後佢戴上皇冠，披上黃金黑色水晶外殼，好似女皇一樣演繹歌曲《我們的主題曲》，唔少Fans仲跟住大合唱添。之後Sammi再換上白色燈籠衫，腳踏10吋高踭鞋，而講到自己去年憑電影《流水落花》攞到影后，Sammi突然好感觸，聽到Fans嘅歡呼打氣聲，Sammi更忍唔住落淚，佢話：「嚟到今日我有機會演戲、唱歌，到呢一刻我喺呢度載歌載舞，你哋都咁瘋狂enjoy，我好多謝你哋，呢個機會係你哋俾我，我非常珍惜。」

喺Encore環節，換上綠色衫同牛仔褲嘅Sammi，致謝時亦有提及上月因中風入院嘅經理人郭啟華，佢表示Wallance復原得好好，已經回家休息。