邊佑錫會香港粉絲大耍冧功 韓警方立案調查保鑣機場惡行為

新晉韓國男神邊佑錫喺香港首個粉絲見面會日前圓滿結束。見面會一開始，佑錫就興奮演唱主演嘅大熱劇集歌曲《Loveholic》，之後又以廣東話同粉絲打招呼。佑錫以前因為拍攝工作已經嚟過香港，呢次亦好開心可以返嚟，佢亦希望有機會嘅話可以同家人再到港旅遊。
 
而喺互動環節，佑錫就抽選咗幾位幸運觀眾，一齊重演劇集經典橋段，佑錫更主動提出要跟粉絲自拍留念，瞬間引起現場尖叫。佑錫又喺遊戲環節展現趣怪可愛一面，大膽挑戰恐怖箱，又用道具蜘蛛嚇主持人，場面搞笑。

邊佑錫日前於香港舉辦首次Fans見面會，非常親切和善
 
見面會尾聲，粉絲亦精心準備應援回饋，佑錫更喺欣賞應援影片時忍唔住眼淚。而喺佢演唱《I think I did》時中，更被驚喜嘅燈海同手幅應援再次感動落淚。佑錫亦衷心向粉絲致謝，喺活動最後進行歡送同合影環節時，佑錫走出場館正門，同守候嘅粉絲再次作道別，十分窩心。

但係此行出發時保鑣嘅態度行為就引發當地爭議
 
之但係喺佑錫出發到香港前，其實喺仁川機場發生咗一段疑似耍大牌嘅小插曲。佑錫嘅保鑣竟然喺管制入口檢查旅客機票，又用手電筒強光照射路人等行為，引發民怨。雖然保安公司同邊佑錫公司隨後亦作緊急道歉，不過仁川機場警察團已著手調查保鑣公司，並考慮對涉案保鑣提出暴力罪、強制罪等罪名；針對保鑣阻止其他乘客使用機場貴賓室行為，警方亦會調查是否會構成妨礙業務罪。而佑錫喺16日返韓時嘅保鑣陣容亦由6人減少為3人。