蜜運鄧麗欣含春讚台灣男友夠細心 吳君如難忘陳可辛初約會大遲到

吳君如、鄧麗欣（Stephy）大搞Speed Dating為新戲《我談的那場戀愛》進行宣傳。近日認愛同台灣男友蜜運中嘅滿臉春風，講起男友成個人都甜絲絲。對於男友被極似韓星阿Rain，Stephy就笑得開心：「高度似嘅。」被問男友對於呢個形容滿唔滿意，Stephy表示：「唔知佢有冇匿埋偷偷地開心。」
 
講到同男友相識經過，Stephy透露二人經朋友介紹喺香港認識，而男友亦喺香港工作。雖然Stephy兩任男友都係台灣人，但佢都好識做，大讚香港男士細心、溫柔、有風度，自己會再同台灣人拍拖都只係巧合，因為個性好夾先會長展開戀情。
 
Stephy喺活動上分享自己交友約會結識異性，最緊要係對方要夠細心又有風度，聽落去男友都好符合佢嘅要求。不過最重要都係相處時嘅感覺，而細心呢點就最打動自己。而講到會公開戀情嘅原因時，Stephy就搞笑話：「我冇諗到而家仲有狗仔隊。」自己都係因為被影到，所以先會公開。
 
君如就最怕男士喺約會時孤寒又唔夠慷慨，亦大爆自己當年同陳可辛（Peter）首次約會趣事，透露自己暗示Peter要請食飯，但最終變成AA制。君如仲話，有件事令佢會記一世。就係Peter第一次約佢食飯已經遲到45分鐘，但遲到原因係，Peter為咗買件衫吸引佢。君如對呢個解釋感到不可思議，自己好難認同呢個舉動。佢又笑言好記得Peter當時嘅打扮，因為同而家一模一樣。
 
話咁快，君如同Peter嘅愛女陳是知（Jillian）已經18歲，兩母女嘅感情好到無所不談，所以君如都唔擔心阿女拍拖會收收埋埋，反而覺得阿女乖過頭。君如就話，Jillian同同學相約去酒吧，結果間間酒吧都拒絕佢地入內，君如就認為係阿女著得太保守，完全冇去蒲嘅感覺。所以最後Jillian就決定同同學一齊返屋企，睇電影，結束去酒吧嘅想法。