文凱玲早產誕4磅小龍女 BB郁動少咗入急症室開刀生B

文凱玲（Connie）今年3月結婚，今年母親節報喜，7月3號迎來阿女IYLA出世，今日佢就講出早產經歷，指阿女本來預產期係7月尾，但係BB已出咗世個半月，經歷完一段手忙腳亂嘅時期，佢終於有時間講吓早產生B過程，稱阿女出世4磅，影相嗰陣差唔多7磅。

文凱玲今日就講出早產經歷。

文凱玲回想生B當晚覺得BB比平時郁動少咗好多，佢就去咗急症室，先確認一下BB冇問題，結果佢直接住院做咗一連串檢查，搞到成晚冇瞓，之後醫生提出要即刻開刀生B，文凱玲坦言準備開刀嗰陣，自己心情好驚好擔心，佢幻想咗好多可能會出現嘅問題同情況，幸好BB好健康，出世嘅時候仲喊得好大聲！

文凱玲回想生B當晚覺得BB比平時郁動少咗好多，佢就去咗急症室，先確認一下BB冇問題。

文凱玲又指喺婦科病房裡面，大部份媽媽隔籬都有BB，只有佢得一個，一到夜晚嘅時候感覺特別失落，文凱玲出院時，BB仍要繼續留喺醫院，「明明生完但係冇得帶BB返屋企感覺好奇怪，之後一段時間我有時都會以為BB仲喺我個肚裏面」。

文凱玲指幸好BB好健康，出世嘅時候仲喊得好大聲！

文凱玲坐月時乖乖留喺屋企養好身體：「因為BB早咗出世，啱啱搬完屋箱都未拆，BB啲嘢都未準備，所以變咗每日忙住執屋、買嘢同埋泵奶再拎去醫院睇BB。」

文凱玲今年3月結婚，今年母親節報喜，7月3號迎來阿女IYLA出世。

文凱玲稱好在BB健康出院，雖然阿女返咗屋企之後，文凱玲每一日雖然好忙，但係好開心，成日攬住望住阿女，而阿女喊聲好大聲，感覺IYLA係好有中氣嘅健康BB。文凱玲目前正餵母乳，而IYLA晚上特別活躍，所以佢未有足夠休息及保養自己身體，暫時佢仍會接啲簡單工作，希望盡量抽多啲時間陪阿女，見證阿女成長。