溫碧霞下周生日老公提早辦Party 壽星女性感現身切足5個蛋糕

7月30號就踏入58歲生日嘅美魔女 溫碧霞 ，雖然下星期先係正日生日，不過Irene老公 何祖光(Kenny)日前已花盡心思特別為佢安排一場生日派對，仲邀請咗Irene一班至愛親朋出席，為老婆提早慶祝。

下星期生日嘅溫碧霞獲老公Kenny辦派對預先慶祝

Irene同Kenny結婚24年來一直恩愛如昔，Kenny為愛妻慶祝生日，就專程邀請一班Irene多年好友以及同事，齊齊參與生日派對為佢提早慶生，當中包括Irene嘅經理人公司同事、商界女神 胡曦文(Christy)等，而正於美國讀書嘅囝囝 何國倫(Xavier)亦專程返港為媽咪慶祝。

除囝囝Xavier由美國返港，大班好朋友都有參與

Irene於派對當日一貫精心打扮，身穿一襲白色吊帶連身裙，酥胸半露，非常性感。心情大靚嘅Irene非常開心，全程滿場飛未停過，佢話：「因為我好耐唔喺香港，今次喺Party一次過同好多年冇見嘅好朋友見面，好開心。」佢又甜笑多謝老公話：「佢送咗紮花畀我，因為我正日係30號，未知佢送咩禮物畀我。」

Irene以低胸性感打扮現身派對

呢日Party一次過切5個生日蛋糕，其中一個由老公所送，佢本人亦訂購一個送予同月生日嘅朋友，提到生日願望，Irene就話：「最緊要心想事成，希望自己工作室繼續拍多啲好戲，新片《謊島美人魚》有好口碑同大賣，樣樣順意、身體健康，大家都開開心心。」Irene出席完派對後，已飛往峇里島，準備於當地過一個火辣辣生日。

Irene生日願望不忘工作，派對後佢已飛往峇里度假