陳秋霞入行50周年出新書念亡母 區瑞強事前不知胞弟參與《中聲3》海選

70年代玉女歌手陳秋霞自1981年與馬來西亞百億「鋼鐵大王」兼拿督鍾廷森結婚便淡出幕前，一直長居大馬，久未露面嘅陳秋霞呢日現身書展，為推出新書舉行簽名會。

日前推出新書嘅陳秋霞呢日舉行發佈會

陳秋霞獲兩個女兒及姨甥鄺祖德、老友陳秀珠、區瑞強、邵音音、車淑梅、周國豐、填詞人向雪懷等到場支持，今年係陳秋霞入行50周年，佢想出書講吓細個生活、中學回憶、娛圈七年嘅點滴等，陳秋霞撰寫呢本新書嘅收益全數作慈善用途，亦希望紀念佢離世嘅母親。

大批好友到書展支持佢嘅新作

陳秋霞於2016年發現患上乳癌，經過手術同化療後，而家病情穩定，佢好珍惜同家人相處嘅日子，開心弄孫為樂，為咗照顧寶貝孫，佢要每星期接受物理治療，預防勝於治療，陳秋霞有時都歌癮起，佢下月同香港中樂團去大馬作特別演出，自爆體力只能唱三首歌。

早年力拼乳癌康復嘅佢，目前弄孫為樂

區瑞強胞弟區瑞明日前參與《中年好聲音3》海選成為焦點之一，區瑞強事前唔知細佬參賽，笑指唔敢叫細佬參加，之後望一望身旁嘅《中聲》評審周國豐，區瑞強笑住講怕細佬入唔到100強，又擔心細佬有壓力，周國豐笑指《中聲》評審好冷血。

區瑞強嘅胞弟日前參與《中聲3》海選，原來事前Albert並唔知情