梁思浩揭黑材料爆「扮可憐」 焫㷫楊思琦公開反擊積口德

正所人紅自然是非多， 梁思浩 主持嘅靈異節目《直播靈接觸》受觀眾歡迎，每集不單邀請唔同嘉賓探討，仲會live為觀眾解決疑難。日前請嚟名導演王晶憶述佢嘅前生冤孽更一度成為熱話。

思浩日前邀請王晶擔任《直播靈接觸》嘉賓

除咗喺電視主持節目成焦點之外，思浩經營嘅個人網上頻道《娛樂好好玩》就因為被指爆料揭秘藝人嘅嘢，而惹起好大迴響。近日思浩喺節目上直指2001年港姐冠軍楊思琦「扮可憐」，仲講出一個關鍵線索，指思琦當時自稱被欺負時，正拍攝一部由三位女星共同主演嘅劇集，精明網民一猜就話係當年由思琦、佘詩曼同郭羨妮主演嘅《無名天使3D》，翻查資料當年拍攝呢套劇集時，的確曾經傳出過思琦同兩位女主角不和嘅消息。

不過早前佢本人嘅網上節目，就爆出同楊思琦之間嘅是非

「扮可憐」事件揚開後，思琦早前已略有所指出post話「So funny﹗無事搞事，你是什麼人啊？」並將自己Whatsapp對話截圖，指搞笑，同對方並無聯絡，出什麼頭？笑死。事件一直未平息，至22日思浩錄製節目《直播靈接觸》時，親口向傳媒回應事件，指唔驚對方會嬲，自己只係實話實說，又話唔覺得扮嬌嗲，或者扮可憐，係負面及貶意，甚至有啲人楚楚可憐亦係佢自己嘅演繹嚟，內裡佢可能係好剛強，都係一個形象，觀眾鍾意咪得囉。仲話自己喺娛樂圈做咗40年，只係將睇到嘅人與事講一次，我讚人時又唔見大家講。

思琦再於網上留言反擊指控

思浩嘅言論再度激發思琦情緒作出大反擊，23日思琦嬲爆上截新聞內容截圖指，「為做節目，故弄玄虛，說是說非，嘩眾取寵，有人信嗎？哪有這樣的人？男子漢，多做事，少說話，積口德，才是人！大家小心﹗」直接否認自己係思浩口中所言論嘅「扮可憐」者。

其實思浩近日都一波未平一波又起，好似之前好友陳彥行(行姐)未婚生女以及另一半身份嘅消息曝光，就有矛頭直指思浩係洩密者，事後思浩就以自己講嘢好直嚟回應，如果有男朋友、生小朋友不妨分享喜悅，免得介紹男性朋友畀對方時出現尷尬情況，畀人淋鏹水呀。思浩坦言事件雖然冇影響到佢同行姐嘅友誼，但承認會有芥蒂。

早前陳彥行誕女一事，思浩亦一度被指係爆料人
行姐事後亦曾回應此事