李思林露面走出李玟離世傷痛 車婉婉發起袁彩雲飯局被埋怨

久未露面嘅二家姐 李思林 呢日同 韋綺姍 彭家麗 可嵐 李佳 胡渭康 車婉婉 涂家堯 劉智衛 等現身一個開幕活動。Coco離世超過一年，二家姐亦慢慢走出傷痛，見佢呢日精神唔錯，二家姐都有透露自己嘅近況，得閒亦有同中聲家族嘅朋友見面，佢亦希望去《中年好聲音3 》探班。

李思林呢日罕有現身公開活動
講到早前袁彩雲同老公及囡囡返港放暑假，仲約昔日電視台老友食飯，有出席飯局嘅婉婉話好難得大家嘅友誼可以保持到咁耐，佢仲大爆當年同彩雲仲係單身時經常相約打高球解寂寞。
車婉婉早前同袁彩雲飯聚，但係事後就收到大量電話喇

原來呢個飯局源自彩雲到《中聲3》後台探班，跟住即時發起，大家一呼百應。飯局上仲見到久未露面嘅黃𨥈瑩、陳彥行等。婉婉透露飯局上大家暢所欲言無所不談，話題更係「不設防」。點合事後好多老友見到相後投訴未有受邀，所以婉婉都期待下次再辦更盛大嘅飯局。 《中年好聲音3》展開錄影，為海選任評審嘅韋綺姍亦有入場觀摩戰況， Rita透露呢次依然係高手雲集，亦有唔少洋蔥，好似當中有兩位傷健人士嘅參加，包括失明嘅朱麗萍以及沒有雙臂嘅大灣區選手李金凱，佢地嘅故事令人相當動容。而涂家堯作為中一生亦有向師弟師妹們分享經驗。 
Rita老師透露《中聲3》有唔少賺人熱淚嘅故事

有份參加《中聲3》海選嘅可嵐最終未有入圍，唔少網民都覺得好驚訝﹐不過可嵐就欣然接受結果，佢話雖然有啲可惜，但聽到《中聲3》嘅記招度公布可能會有歌手賽，可嵐就話隨時準備好，希望到時節目組俾佢參加。

有參加海選嘅可嵐(右一)未入圍百人名單，佢就指隨時準備好參加歌手賽嘅賽事喎