李幸倪如願與馮允謙合作寫歌 道出人生經歷情緒到爆喊

李幸倪(Gin Lee)啱啱推出新歌《新牌仔》，今次新作主題圍繞成長課題，除咗搵嚟黃偉文（Wyman）填詞外，更特意邀請好友馮允謙（Jay Fung）一起創作。Gin同Jay Fung認識多年，平日閒聊都會提到寫歌，但一直未有行動，直到今年二人合作拉闊音樂會時再次講起相關話題終於成事。Gin指本來兩人寫咗首歌，當順利完成後，大家都覺得仲有精力同好多諗法，可以去創作另外一首歌，所以Gin好興奮將自己構思嘅故事講一次出嚟，大家不約而同認為題材好有趣，於是《新牌仔》就在呢個情況下誕生。

Gin Lee嘅新歌同Jay Fung一齊創作，更由Wyman填詞

Wyman嘅填詞擊中Gin嘅小心臟，同時覺得係Wyman畀佢嘅一個小禮物，Gin話：「尤其係講父母嗰part，佢知道我同屋企人感情好好，我好想孝順父母，但有時做唔到，因為我要離鄉別井追求自己想要嘅嘢，歌詞有句『但對父母親 別提及傷口』；第一句『大踏步 踏出氧氣罩』都好有感覺，因為我係七星女，唔足月出世，一出世就要瞓氧氣箱一個月先可以出嚟。」

佢仲提及自己係「七星女」未足月出世嘅故事
Gin又憶起讀大學時，有日同班同學同佢分享屋企事，話點解佢爸爸會係咁？我就突然有個諗法，同佢講其實你爸爸都係第一次做爸爸，可能有好多嘢佢都係學緊，你唔好怪佢啦，可能佢之前做得唔好，但經過嗰次之後佢有嘗試補救、有嘗試做返好，不如你原諒佢或者俾多次機會佢。Gin更道出小時候嘅心聲，細個時總覺得大人應該咩都識，但長大後先知並非如此，所以人生係要不停學習，冇人永遠一百分。

於學校拍攝MV再加上歌曲內容，非常貼合畢業季節心情

至於MV方面，Gin首度同跟女導演麥曦茵合作，希望透過女性嘅敏感度，感受girl's talk，然後再用佢嘅方法將感受呈現喺MV中。Gin好記得以一個好速方式將自己人生講畀導演聽，期間更講到喊，講到某個位講唔落去，隔咗五分鐘平復後先可再繼續，估唔到會講到自己喊，可能導演都有嚇親。不過另一方面，又係一個幾得意嘅過程，因為Gin係之前係完全未見過面，但合作後係佢彷彿認識咗自己一生。