電影泉攻略丨介紹8米長死侍打卡位 《死侍與狼人》為愛與友情而戰 丨EP113

王鎮泉 Jeoffrey 每星期為你提供新鮮熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。

Marvel最新力作《死侍與狼人》即將於7月24日上映，Jeoffrey呢日介紹尖沙咀期間限定特設8米長死侍嘅打卡區！本週新片速遞有《死侍與狼人》講死侍決心金盤洗手，拋開江湖恩怨，諗住喺一間二手車行過埋下半世，但係當世界將面臨滅世危機，佢焗住再次著上緊身戰衣，說服狼人Hugh Jackman一齊拯救，為愛與友情而戰！
泉叔帶大家去睇Deadpool新戲打卡位。
《盜墓奇美拉》講奇美拉係希臘神獸，象徵「期待實現嘅渴望」，神秘嘅阿圖嚟自英國，擁有道金術天賦，喺意大利以盜墓為生，可惜一次失手入獄後被迫與女友訣別，阿圖出獄後失魂落魄，聯同盜墓團夥重操故業，渴望一夜致富，但奇美拉卻係阿圖觸不可及嘅摰愛。

《DDDD惡魔的破壞(後章)》講3年前一艘「侵略者」嘅巨大母艦突然降臨喺東京上空，人類面臨世界末日，巨大飛碟不斷於天空盤旋，不過喺一個充滿絕望同未知嘅時代背景下，高中女生嘅青春歲月先正要展開。

《劫機1971》講前戰機機師泰仁因意外被迫退出南韓空軍，轉任商用客機副機長。一次航程卻發生爆炸並揭開峰迴路轉嘅劫機事，泰仁聯同空中服務員玉順與機長江勳一齊對抗年青卻兇悍嘅劫機者，保護所有人質，同時阻止班機飛越北緯38度線進入北韓領空，更要應付前嚟攔截嘅多部戰機。

Jeoffrey亦有獨家訪問《劫機1971》主演嘅河正宇同呂珍九，講吓佢哋拍攝難忘點滴，河正宇大讚美術組還原1970年代飛機艙嘅真實場景，又搭建一架真實嘅飛機，呂珍九指模仿真實環境拍攝，對佢哋代入劇情拍攝有好大幫助。

至於本周票房龍虎榜截至7月24日中午，第三位《壞蛋獎門人4》；第二位《龍捲風》；第一位《玩轉腦朋友2》。