與陳家樂張文傑到吉隆坡宣傳新片 黃宗澤呻戲中跑太多寧願被砍死

黃宗澤上星期喺香港出席完佢有份主演嘅新片《紮職3》首映禮後，即刻馬不停蹄同導演吳家偉，起程到吉隆坡及檳城宣傳電影，而電影動作指導「四仔」張文傑（German）及忙緊拍戲嘅陳家樂，亦抽空出席電影發佈會。
左起：導演吳家偉、張文傑、陳家樂、黃宗澤
吉隆坡宣傳現場，有逾千名fans在場等候，眾演員到場後，除咗距離同fans互動送簽名海報外，佢哋仲落台同大家合照，讓在場fans們興奮不已。Bosco直言出道多年，自己都係首次到馬來西亞為電影宣傳同謝票，加上難得邀請到German一齊出席宣傳，故三人難免會講下電影中動作場面，Bosco指戲中有連場追逐同打鬥戲，佢話每次拍追逐戲都跑到好吃力，所以佢同導演講，如果開拍《紮職4》嘅話，要申請演鄭浩南嘅角色，因為起碼畀人砍死都非常有型呀！
Bosco同fans作近距離接觸。陳家樂同fans們擊掌。
作為電影動作指導嘅German，就趁喺馬來西亞拍戲空擋，抽時間出席電影發佈會及影迷面會，席間German大讚黃宗澤、張繼聰 、陳家樂：「有時候我會擔心三位能不能做到，是否需要預備替身？其實去到現場，他們三個都很落力，相信自己能做到。所以很多打鬥場面都是他們親自上陣！其中一場（戲）是跑彌敦道，非常危險，他們都堅持自己跳欄桿，我都擔心他們跌倒。」
Bosco話自己首次到馬來西亞為電影宣傳同謝票。
提到喺大街跑嘅戲份，Bosco同German都提議如果拍《紮職4》嘅話，就去吉隆坡Pavilion外面街道跑，Bosco仲話因為自己同電影團隊已經有晒默契，加上拍攝過程都好開心，所以佢希望可以拍到《紮職74》，但唯一要求就係要申請唔好再跑咁多。
動作指導張文傑亦有出席。