星光路上｜姚子羚入行前曾做過啤酒sales 揚言要同胡定欣公平競爭視后

入行超過20年嘅姚子羚，呢日作客《星光路上》同主播 潘盈慧 傾下偈，曾經分享過入行前做過文職，但原來姚子羚仲打過一份好特別嘅工，就係啤酒銷售員，不過就唔係大家想像中嗰種短裙啤酒妹，而係着晒長褲喺酒店推銷啤酒，子羚話工作輕鬆，人工又唔錯，絕對可以話係筍工。

子羚入行前曾推銷啤酒

講到入行經歷，原來起源於追星，當年視F4為偶像嘅子羚，為咗F4參加廣播劇比賽，除咗贏得同F4一齊演廣播劇嘅機會，亦都因此入行。

初初入行做主持嘅子羚，因為已故導演錢國偉，而拍咗人生第一套劇集《當四葉草碰上劍尖時》，當年成班年輕演員一齊去到塞班島拍外景，而家諗返起都覺得好開心。

入行冇耐佢就有機會拍攝《四葉草》

而《棟篤神探》就令子羚對演員身份有更深入嘅認識，其中有場戲，講子羚被郭峰餵毒，搞到成頭成面都係白色粉末，性格倔強嘅子羚因為唔想屋企人擔心，拍完場戲返到屋企一路強顏歡笑，但一入到廁所沖涼就忍唔住喊。

而啱啱播完大結局嘅《反黑英雄》，子羚嘅演技更加受到肯定，尤其佢同張振朗嘅感情線令人睇得好心痛，大家都睇好子羚有機會衝擊視后，不過佢自己就話對獎項抱平常心，仲搞笑話要好姐妹胡定欣千祈唔好讓賽，話要要同佢公平競爭喎。

Elaine提到近日《反黑》嘅悲慘演出，都忍唔住笑角色命運悲慘

另外講到子羚，大家一定會諗到佢有個花名叫表哥，子羚坦言初初確實有唔開心，不過心態轉變之後就覺得無傷大雅，反而自己都會攞來講笑添。

仲被網民改圖惡搞嘅子羚，仲話一早已經接受「表哥」呢個外號，更會以此幽自己一默