方力申採訪奧運功成身退 扑咪洽到好處仍謙遜唔稱職

今屆巴黎奧運已經舉行超過一半，代表TVB到當地為大家直擊過唔少賽事嘅 方力申 正式宣佈已完成今屆工作，自開賽以來做過唔少突出訪問嘅小方，唔止能以運動員角度向受訪者提問，令唔少網友大讚，小方與香港泳隊之間嘅對答亦洽到好處，既能問到參賽感受，亦以輕鬆對話令大家見到為奧運奮鬥多年嘅運動員真情一面。

TVB派出採訪隊到巴黎直擊各項精彩比賽方力申到唔同場館採訪賽事，準備非常充份

星期六小方於游泳館採訪參加4X100女子混合泳初賽嘅 何詩蓓 歐鎧淳 簡綽桐 同 譚凱琳 時，就以朋友加專業角度同幾位港隊成員深入分享，其中佢嘅好友兼港隊老將 歐鎧淳 更幾乎被小方講笑形式感謝而逼出眼淚。

上屆東京奧運小方已經曾採訪過何思蓓

港隊泳將出身後轉任藝人嘅小方，對今次嘅採訪任務非常認真，雖然準備充足，不過佢亦坦承壓力唔細，除咗訪問時間受限而要爭分奪秒，問嘅問題亦要多加考慮受訪者感受與觀眾想知嘅訊息，加上今屆奧運前線採訪人員受盡各界關注，小方就認為形成一定壓力喇。

拉器材攞腳架走勻唔同場館為大家訪問唔同運動員

已經第四屆為奧運主持嘅小方，高分完成今屆任務之後，於社交平台撰文，分享認為自己並非表現傑出，佢話：

「隨著港隊游泳代表隊結束所有賽事，我這位「無綫巴黎特派專員」的任務也告一段落。我從一位學生運動員轉型成為藝人，面對不同身份，不同崗位：做歌手、做演員、做主持、做司儀、做記者等等，一直邊學邊做，感謝這些年來觀眾對我的包容，給我時間慢慢成長。」

入行前小方亦係港隊成員之一

「老實說，其實我根本不適合做記者，我臉皮薄，玻璃心，反應慢，詞又窮，還有時候我的偶包/奧運選手包袱又會突然走出來一點，不過，我實在是太喜歡體育運動，太喜歡游泳了，我真的不能錯過能夠親臨現場，參與其中的機會，所以我這個小記者也要發揮「香港精神」，面對困難時需應變，不能輕易放棄，要有毅力去克服障礙。」

每日冗長嘅連綿採訪，鏡頭後席地而坐

「運動真的能激勵人心，凝聚社會，感謝所有港隊運動員，教練及幕後團隊的努力，盡顯體育精神。再次恭喜Vivian，Siobhan 同家朗，不斷突破自己，為港爭光，創造歷史，你們的成就將為年輕一代的運動員爭取到更多的資源，更多的出路，讓土生土長的運動員有更堅定及清晰的目標。多謝你們，多謝港隊代表團，多謝各位支持我們的觀眾，多謝我的台前幕後的所有同事，我們後會有期。」
退役轉型後嘅小方，繼續於泳界發展，年前行善環島游又開設泳會