吳千語意國婚禮佈置超浪漫於千年歷史古建築外設歡迎晚宴

吳千語同百億富三代施伯雄Brian早前被爆出於8月3號喺意大利Borgo San Felice舉辦婚禮，而未能親身飛到當地出席嘅蔡卓妍同Janice Man文詠珊，亦喺3號post出與吳千語嘅合照，祝福對方，當中Janice Man更喺帖文中表示：「我準備好線上直播🥹期待你美美的出現祝福你和Brian 永遠幸福快樂！白頭偕老！甜甜蜜蜜！」
吳千語post出歡迎晚宴嘅照片。Janice Man喺社交平台送上祝福。
而吳千語亦喺3號晚於微博分享出6張歡迎晚宴嘅照片，當中着住低胸粉色雪紡長裙嘅吳千語，拖住身穿白色西裝嘅施伯雄喺酒莊步出，身後仲跟住3人樂隊為其伴奏。呢次晚宴設於經過修復嘅8世紀嘅古建築外嘅露天莊園，餐桌上以白色蠟燭同紫色雛菊嚟佈置，當中更放咗當地有名嘅杏桃同梨，滿滿異國浪漫氛圍。
吳千語喺微博分享歡迎晚宴嘅照片。一對新人手拖手出嚟迎接賓客。
今次吳千語嘅婚禮同去年12月喺香港舉行嘅簽字結婚儀式一樣，保密度相當高，除咗吳千語自己放出嘅相片外，受邀到當地嘅賓客都只係分享當地嘅風景、一對新人為大家準備嘅房間等周邊嘅照片，但關於婚禮同晚宴嘅相就未有流出。