羅家英忙籌備粵劇演出 與汪明荃簡單食飯慶生

羅家英 呢日聯同謝曉瑩、高潤鴻、李龍、新劍郎、梁兆明等一眾粵劇界人士現身粵劇發布會，家英哥將會參與謝曉瑩擔任編劇兼主演嘅粵劇，喺9月時嘅公演，謝曉瑩更費盡唇舌邀請家英哥合唱，對於謝曉瑩不斷嘅說服，家英哥話佢都習以為常，佢仲話好欣賞謝曉瑩勤力進取嘅認真態度呀。

家英哥因為謝曉瑩嘅誠意而決定合作

雖然忙住粵劇嘅演出，但家英哥當然唔會忘記八月呢個大日子啦，講緊嘅咪就係阿姐汪明荃嘅生日囉，不過家英哥就話由於工作太忙，所以都無出遊嘅計劃，只係會安排同阿姐食飯慶祝吓，至於問到佢有無為阿姐準備禮物，家英哥就話唔晒啦，阿姐已經咩都有，佢仲講起有次佢重新購入遺失嘅婚戒，送咗個驚喜比阿姐呀。

謝曉瑩今次嘅作品身邊有大量男角包圍
而呢次喺劇中，謝曉瑩 嘅角色身邊圍繞多位男士，當中有人對佢一往情深、有人因愛成恨、又有人將愛收於心底，講到若果現實生活中，都面對呢啲愛情抉擇時佢會點做？謝曉瑩諗都唔諗就話一定揀佢老公高潤鴻呀。