張馳豪恨拍電影盼出唱片 稱家人冇催抱孫唔急拍拖

啱啱推出新歌嘅 張馳豪Aska ，呢日就作客電台受訪，咁啱撞正佢30歲嘅正日生日，獲電台送上精美嘅結他蛋糕。
電台為張馳豪送上生日蛋糕。
雖然係轉字頭，不過Aska就話自己唔着重儀式感，喺工作中度生日已經係最好嘅安排，佢又笑言如果呢日唔係要開工，自己都唔知做咩好，可能係同家人食餐飯就算。Aska話由於自己冇咩儀式感，所以一到節日就好頭痕，當大家普天同慶咁慶祝時，自己只係覺得係普通嘅新一天」。
張馳豪話生日願望係想出碟同拍電影。
Aska指媽媽有送上生日祝福，但就搞笑咁話因為自己口才唔好，所以搵嚟A.I幫手，度身訂造咗一份專屬嘅祝福說話畀佢，Aska話收到時幾感動呀。講到生日願望，Aska就話自己好希望可以拍電影，同時希望今年可以出到唱片，至於問到有冇被催拍拖？Aska話屋企人冇催要抱孫嗰啲，加上而家工作都花費好多精力，所以自己唔趕住拍拖呀！