蘇慧倫相隔12年演殺人魔 網民預測有份入圍金鐘獎

蘇慧倫復出後除咗喺歌壇發展，更相隔12年再度拍劇，喺大熱嘅法醫劇中飾演殺人魔嘅佢演技大爆發，對於網民預測佢有望入圍金鐘獎，蘇慧倫就話冇諗咁多，但好感謝導演同劇組對佢嘅信任，將呢個角色交畀佢演。喺拍攝期間佢都將自己交出去，跟對方合作中亦學到好多嘢。播出之後，佢都有向身邊工作人員查問，喺角色中有冇蘇慧倫嘅感覺，但大家一致表示睇唔到，呢個答案令佢好開心。
蘇慧倫呢日喺台灣出席活動。
飾演反派而被觀眾討厭，其實都係一種欣賞同肯定，不過有啲粉絲嘅留言就令蘇慧倫哭笑不得，當中有人話睇完佢殺人魔演出後，表示之後唔知用咩心態聽蘇慧倫唱歌，搞到蘇慧倫都唔知將來用咩心態唱歌。被問到將來會唱歌定演戲時，佢就話冇特別去諗，暫時都以唱歌為主，演戲就跟之前一樣看緣份同有冇適合嘅角色。
蘇慧倫喺大熱劇飾演殺人魔。
兼顧家庭同事業絕對唔易，蘇慧倫都話想嚟個單獨旅行獨處，但又對拋夫棄子呢個形容詞怕怕。之前外出工作囝囝都冇抱怨，佢話自己好珍惜同囝囝相處時間，尤其係唔知道男生係咪會有一日想獨立，作為媽媽諗法就想多陪一刻。