劉威煌 一連兩場演唱會周末於麥花臣場館舉行。今次係「隊長」連續第4年舉行個唱,今次主題「REunite(重聚)」亦係四部曲當中嘅最終章,威煌為自己由當年《超級巨聲》走到《中年好聲音2》作總結,又感謝兩次競賽節目,令自己實現夢想。唔少圈中好友都有捧場,好似周國豐、黎瑞恩、區永權、顏志恒、何婉盈、韋綺珊、關寶慧、彭嘉麗、湯寶如等。
再次舉行演唱會嘅劉威煌,獲多位好友捧場
身穿一身塗鴉服裝嘅威煌徐徐走上舞台,以一曲《不離不棄》為演唱會揭開序幕,緊接嘅《老茶遊記》、《完美男人》,令台下歡呼聲不絕。
完成首部份演出後,威煌向台下觀眾打完招呼之後話:「我以為你哋睇奧運會睇到聲沙,今次演唱會叫重聚。」之後就接連唱出Swing嘅《1984》、VRF嘅《妄想》、鄭伊健嘅《廿世紀的戀人們》同杜德偉嘅《Because I love You》多首歌曲。
佢仲搞笑話擔心觀眾因為睇奧運時差而冇力嗌
之後嘅搖滾勁歌環節,威煌特別將Beyond嘅《天與地》、《金屬狂人》、《醒你》等歌曲串連成Medley,大批歌迷走到台前一齊跳一齊唱,全場High爆。
強烈過後,著名爵士鋼琴家古馳、同身為《聲夢傳奇2》亞軍兼小提琴演奏家嘅 黃洛妍 為威煌伴奏,獻唱《當這地球沒有花》、《六月飛霜》。威煌仲同Janees精彩合唱《對等關係》同《她來聽我的演唱會》。「HZD輕鬆啲」嘅梁浩賢、甘永傑、梁思傑、潘文龍、王嘉明亦為呢晚演出擔任表演嘉賓。
黃洛妍呢晚唔上為威煌伴奏,兩人亦合唱演出
到演出尾段,威煌分別唱出《每一句說話》、《分分鐘需要你》同《感激我遇見》,期間全場大合唱,威煌話:「感激我遇見你哋,多謝在座每一位。今晚好多選擇,你哋選擇咗嚟睇呢個演唱會,好感謝。」
佢又感激歌迷們一直對自己嘅支持
到Encore環節,威煌發表感言時,除咗感謝身邊人幫忙,更開腔多謝太太:「佢唔比我多謝佢,但呢個過程好辛苦,好多事要安排,過完比賽加上工作,很多事要兼顧,真係要多謝佢,佢會知道㗎喇!我成日話自己辛苦,但身邊人更辛苦,台上攞彩就係我,其實佢哋幫我好多。」
又公開一直默默於身邊支持自己嘅太太
威煌又提到當年離開TVB,又因《中聲2》重返娘家:「好多人問我走咗又返去,究竟係喜愛定唔喜愛TVB?我係喜愛嘅!冇《超級巨聲》都冇人識我,冇可能實現我的夢想。參加《中年好聲音2》,識咗一班朋友,好enjoy成個過程,並唔係為爭名逐利,都多謝呢個節目。我並不是天皇巨星,高人一等,只係好鍾意唱歌,我只係一個普通人。」
最後威煌獻唱一曲《普通人》,為首場演唱會劃上句號。