梁漢文下月孖張衞健雲頂開騷黎諾懿呻暑假湊仔攰過拍劇

正喺佛山拍攝電視劇嘅梁漢文，呢日同蕭正楠、高海寧、黎諾懿、姚子羚、陳自瑤同朱晨麗等現身澳門為節目錄影。
梁漢文應曾志偉邀請到澳門獻唱。
梁漢文話自己之所以現身，係因為收到總經理曾志偉嘅邀請，想佢嚟現場唱返兩首歌，所以佢就即刻向劇組度期呀。梁漢文又爆嚟到現場一見到志偉，就畀對方隊咗杯白酒，事後梁漢文話自己細細個入行就認識志偉，對方可以話由細睇到佢大，所以每次見面都係會咁熱情呀。9月將會同張衞健去到雲頂開騷，梁漢文就預告個騷好聽之餘仲會好好笑，佢又指希望喺雲頂開完後都可以返嚟香港開多次。
梁漢文下月將會同張衞健開騷。
蕭正楠雖然近期喺佛山拍攝新劇《巨塔之後》，但佢都有爭取時間返香港親自下廚，慰勞喺法國採訪完奧運返港嘅老婆黃翠如。而偷偷放咗3日假去旅行嘅高ling，就笑言因為yen平，所以呢次快閃之旅有開心shopping呀。
蕭正楠話有專登返港煮飯畀老婆食。高ling早前忙裡偷閒去咗日本旅行。
對於暑期接近尾聲，黎諾懿就開心表示自己終於忙完，佢仲誇張咁話由囝囝放暑期開始，自己就好似拍咗四套劇咁攰，而家只要朝早送咗囝囝返學，啲時間就係Me Time，同時又可以出返嚟幕前見大家。Yoyo就話呢個暑假因為要喺內地拍劇而陪唔到囡囡，所以佢就叫咗家人陪囡囡去旅行補數喇。
陳自瑤暑假忙拍劇，陪唔到囡囡去旅行。梁漢文、姚子羚、陳自瑤、黎諾懿。
洪永城嘅大女已經開始返N班，佢話見到囡囡着起校服走入班房、放學再接囡囡，成件事都令佢好感動，Tony又讚囡囡第一日返學相當叻女冇喊過，反而返得好開心呀。