《法證》鐵三角北京宣傳 黃宗澤狂耍冧功 蔡潔霸氣擸兩男神做男友

黃宗澤、蔡潔同袁偉豪呢個《法證先鋒VI倖存者的救贖》嘅鐵三角組合近日去北京宣傳，Bosco全程成為氣氛擔當，唔單止帶領拍檔行catwalk，更有求必應同觀眾合照打卡，仲向粉絲大講甜言蜜語，令到其他地區嘅粉絲相當羨慕。而Bosco本人好享受同粉絲近距離互動嘅宣傳方式。

《法證》鐵三角日前到北京宣傳

鐵三角除咗同粉絲面對面互動之外，喺宣傳行程中亦有多場直播，回應粉絲嘅提問，當中有粉絲問蔡潔現實中佢會揀Bosco定阿Ben做男友，蔡潔嘅答案亦相當霸氣:「成年人不會選擇，梗係兩個都要!」

Bosco同Fans近距接觸，佢就話非常享受同大家見面喇

劇中蔡潔有多場戲份成為網民熱話，好似落沙井驗屍同出浴戲等，蔡潔親自解構令人充滿幻想嘅出浴戲份，背後其實係著潛水衣拍攝，只係有需要時露肩同露腿拍攝，一啲都唔怕凍親。

兩位猛男咁抱起蔡潔，難怪佢話兩個都想要啦

另外劇中阿Ben同傅嘉莉知道馬貫東嘅死因後，兩人喺車廂中嘅完美演繹悲傷情緒獲觀眾大讚，阿Ben有講解返拍攝時嘅情景，原來呢場戲喺Ben自己嘅座駕駛上香港嘅真公路度拍攝，為免重拍多次，兩位演員嚴陣以待，車廂上更安裝咗多個鏡頭同時操作。Ben要邊顧住路面情況一邊顧住情緒演繹，最後佢哋拍咗兩Take就成功。