木村光希向父母請教拍親密戲 透露木村拓哉贈金句打氣

木村拓哉同工藤靜香嘅細女木村光希（Koki），早前接拍咗一套冰島愛情電影，戲中除咗近乎以全英語演出外，21歲嘅Koki仲同男主角有多場大尺度嘅戲份。
木村光希接受泉叔嘅訪問。
早前Koki就以視頻接受 王鎮泉 《StarTalk》嘅訪問，當提到拍攝戲中嘅親密戲時，有咁多工作人員在場會唔會令佢好大壓力？Koki話因為同拍攝團隊就好似家人一樣，所以拍攝時冇壓力，加上拍攝親密戲時有動作指導在場，對方都畀咗佢好大嘅幫助。
Koki喺新片同男主角有唔少親密畫面。Koki喺片中差唔多以全英語拍攝。
Koki又指拍呢套戲時每日都會打畀爸爸媽媽，同時亦有問佢哋要拍呢啲鏡頭時，可以點樣演繹得好啲，Koki話爸爸畀佢嘅意見就係只要盡力去做，享受過程就好喇，事後Koki仲叫木村將呢句寫咗喺佢劇本嘅封面上，每當自己去到片場時，Koki都會喺心中默念一次爸爸嘅呢句金句，先去開始當日嘅拍攝。
Koki同媽媽工藤靜香感情勁好。
講到木村拓哉被喻為係世界上最帥嘅人物之一，Koki話自己係200%同意，佢又指自己平日鍾意見父母年青時嘅作品同照片，佢話呢啲都係畀到佢能量，令佢再努力去衝刺，Koki仲話父母係佢心中最具份量嘅偶像呀！
Koki非常認同爸爸木村拓哉係型男。