電影泉攻略丨《死侍與狼人》超多驚喜彩蛋 泉叔派福利送異形Cap帽丨EP117

王鎮泉Jeoffrey 每星期為觀眾提供最熱辣電影資訊，中外猛片專訪花絮上映時間全部集齊，「電影泉攻略」個個星期陪你睇新戲。
《泉叔派福利》送出異形Cap帽。
電影《死侍與狼人》全球票房大收，除咗因為佢經常打破第四面牆同觀眾互動外，戲中嘅大量彩蛋亦係一大因素，好似前美國隊長Christopher Evans今次反串做返霹靂火，就令大家相當驚喜。

其實呢套戲開拍時畀狗仔隊影到唔少戲中情景，但唯獨是Christopher客串呢件事，就一啲風聲都有漏出，原來係因為Chris係喺罷工前進行拍攝，而狗仔隊就喺罷工後先發現拍攝場地，加上Chris一去到就已經將啲對白背好晒，所以佢只係用咗兩日就完成拍攝，先可以成功守住呢個秘密。

本週新片速遞有《求救眨眨眼》科技業億萬富翁遇見女侍應，二人瞬即打得火熱，富翁仲邀請女侍應同佢嘅姊妹，遠赴其私人島嶼上渡過一個冇底線兼熱辣辣嘅夢想假期。點知期間怪事連連，令女侍應開始質疑一切。

《解憂計情車》年輕女子深夜抵達紐約甘迺迪機場，一如以往地跳上的士，點知遇上一位歷盡人生百態嘅司機，令佢哋喺呢個狹小嘅車廂中，展開愛情同人生價值觀等睿智對話。

《不丹沒有槍》講述不丹國王希望國家能蛻變成民主體系，自願捨棄王權，授命一班公務員上山下鄉舉行模擬選舉，更指導一頭霧水的村民投票。一個高僧聽到消息，叫徒弟務必要喺模擬選舉日帶兩把槍返嚟，冇人知道佢盤算緊啲咩，但覬覦著槍枝嘅人就唔止高僧一個。

《aespa: MY First page》揭開aespa 830日之間off the record嘅忐忑心情。今次唔只有佢哋獨一無二嘅演出實況，仲有至今爲止未公開過4名成員嘅真實採訪，以及2023首次單獨演唱會嘅後台幕後故事。
Isabela Merced
《泉叔派福利》又返到黎喇，見到呢頂異形Cap帽，就知道今次我哋同《異形：羅穆盧斯》合作啦，一陣睇完製作特輯，再答啱問題又俾我哋抽中嘅「四位」觀眾朋友，將會得到呢頂咁精美嘅電影cap帽一頂㗎。

問題就係，喺電影《異形：羅穆盧斯》裡面，其中一位女演員Isabela Merced係第幾次拍驚悚片呢？

知道答案嘅朋友記得喺今晚十點至十二點期間，私信到「TVB 娛樂新聞台Facebook專頁」，註明《電影泉攻略·泉叔派福利》，記得十點前send嚟嘅答案係唔算數㗎。

呢個禮拜嘅票房戰況，截至8月21號中午，第三位《蠟筆小新劇場版：我們的恐龍日記》、第二位《死侍與狼人》、第一位《異形：羅穆盧斯》。
電影《異形：羅穆盧斯》導演Fede Álvarez