吳姍儒隨時生得照現身金鐘記者會 拍檔姚淳耀勁緊張Sandy潑冷水

吳姍儒 呢日同 姚淳耀 一齊出席10月舉辦嘅金鐘獎記者會，之後Sandy就會為第二胎專心待產，而醫生亦都指佢隨時都生得，所以事前佢都擔心連記者會都出席唔到，不過呢日一上台就乜都唔記得，搞到屋企人都不知幾擔心呀。

Sandy嘅第二胎隨時就會出世同大家Say Hello

佢又提到呢胎陀得比較辛苦，仲有坐骨神經痛，企或者坐都會不適，所以自己亦期待分娩後可以撇甩腰痛嘅煩惱呀。佢嘅綜藝天王爸爸 吳宗憲 上屆典禮後曾揚言唔會再出席，呢日Sandy都唔敢講老竇會唔會突然出現，仲話天秤座嘅佢五時花六時變，所以乜都話唔埋呀。

不過呢一胎佢就話陀得比較辛苦喇

姚淳耀就指自己擔任主持其實非常擔心，仲向有經驗嘅前輩請教，不過呢日就一開口就被拍檔Sandy一盤冷水照頭淋，之後又比返啖砂糖氹返佢，唔知會唔會令佢壓力更大呢？

姚淳耀坦認壓力巨大，不過經驗豐富嘅Sandy仲嚇鬼佢，搞到佢更緊張