梁朝偉捐300萬助弱勢兒童 冇興趣客串劉嘉玲嘅舞台劇

梁朝偉呢日現身一個兒童慈善獎學金頒獎典禮，除咗幫忙宣傳，偉仔仲捐出港幣300萬，同一幅水墨畫作義賣支持獎學金，希望可以幫到更多小朋友。

梁朝偉呢日現身獎學金頒贈儀式

偉仔話係一次機緣巧合而促成呢次合作，當時佢因為拍電影做資料搜集，因而認識咗一班兒科醫生，對方就邀請佢參加去年嘅頒獎活動，偉仔指自己喺活動上被一眾小朋友感動到，覺得佢哋需要大家關注與支持。偉仔指大部分嘅小朋友家庭環境唔係太好，加上有長期病患，但佢哋依然相當堅強，所以好值得大家支持。

偉仔仲將獎學金加碼令更多同學仔受惠

提到今次割愛捐出珍藏嘅水墨畫，偉仔表示希望做到一個帶頭嘅作用，令更加多人去關注及支持，但佢就話暫時未感染到太太劉嘉玲捐出自己嘅珍藏喇。偉仔指自己呢次出席活動，係希望呼籲更多人嚟支持，集腋成裘幫助到更多有需要嘅小朋友。

佢又話期待老婆嘉玲同子華合作演出嘅舞台劇

呢日劉嘉玲亦有陪同偉仔現身，拍攝完歐洲新戲嘅偉仔，呢輪處於休息期，等到10月先會出發去日本擔任東京電影節嘅評審主席，相比起清閒嘅佢，老婆劉嘉玲就要忙住為佢同黃子華嘅舞台劇排練喇。問到偉仔平日有冇陪太太排練？佢就話劇團有綵排，所以唔使佢幫太太排練，至於問到有冇興趣客串演出？偉仔即刻好快咁話自己暫時冇興趣，但就期待太太嘅演出，仲話自己對舞台劇唔熟悉，所以冇畀意見，最緊要係太太開心就得，而到時自己都會飛返嚟支持太太嘅演出。