相隔十年再與內地影迷聚會 胡定欣以親筆心意卡答謝支持

疫情再加上工作繁忙，胡定欣已經十年無同內地影迷聚會。適逢九月係佢嘅生日月，定欣決定飛到上海舉行影迷聚會，好好跟大家聚一聚，正如佢喺生日聚會上收到一張卡寫上「人生有幾多個十年！」定欣承諾大家話：「應承大家不用再等十年，我一定會短時間再回來見面。」佢又感慨萬分話：「嘩！對上一次見大家已經是相隔十年，好感觸！見到不少粉絲由讀書、工作、到今日成為媽媽，時間過得太快！」

胡定欣飛到上海與fans聚會。

生日會上，定欣同粉絲互動玩遊戲，又接受影迷現場點唱，唱出劇集衝上雲霄主題曲《歲月如歌》，亦同影迷合唱《勇氣》同《終身美麗》。定欣笑言影迷反應同上海天氣一樣「熱」。

生日會上定欣同眾人互動玩遊戲。

最後定欣為影迷送上自己親手寫嘅心意卡，答謝大家一路以來支持同陪伴，影迷亦做咗好多充滿心思應援小禮物，好似印有卡通版胡定欣嘅水杯、扣針、年曆咭同明信片等等。收到影迷生日卡寫到：「人生有幾多個十年」，定欣話：「剛好今年將會播出《巾幗梟雄之懸崖》，希望到時有機會到內地宣傳，不用再等十年再跟大家再聚！」

生日會上定欣跟fans合唱。九月係胡定欣嘅生日月。