方健儀「全職炒散」將滿十年學識貪靚 預告新搞作做專訪激勵人心

前記者兼主播 方健儀 跳出主播枱即將十年，之後唔止曾任職廉署新聞主任，近年更以Slasher身份包攬唔少活動同電台節目主持，加上網上嘅社交平台，真係可以話百足咁多爪。

方健儀近年百足咁多爪，瓣瓣都涉足其中
Akina日前就獲出席邀出席本地護膚品牌發佈會，仲分享化身「全職炒散」近十年，自己對護膚同美容比當年身為主播時更加着緊喇，Akina話：「以前剩係掛住報新聞，邊有時間護膚？自由身後反而有時間錫皮膚多啲，又不時有客戶贊助，靚咗之餘仲慳唔少錢。」
早前佢出席護膚品牌發佈會，仲爆離開傳媒行業後學識花更多時間保養肌膚

平時佢出嘅Post雖然有唔少都係旅行食好西嘅，不過話晒係記者出身，佢就預告將有「大茶飯」喇：「我會做新嘅訪談頻道，希望觀眾睇完有激勵、鼓勵作用，嘉賓會以大家熟悉嘅為主， 依家好似方東昇咁樣『尋人』，希望搵到好嘅嘉賓同大家見面。」
除咗為唔同活動擔任主持外，佢仲預告正籌備專訪頻道

雖然Akina新聞界出身，不過同其他已轉職同行相比就非常接地氣，早前仲搞聚會同網友見面：「搞咗個『網友聚會」，我唔敢講係『粉絲』，因為我唔係一個偶像，亦唔想同佢哋有高低之分，大家聚埋一齊整烏冬，成個氣氛好開心，老友記、年青人都參加，其實我一直對搞呢啲活動都冇乜信心，但係原來老、中、青嘅觀眾都比到啲信心我，所以決定用『真身』同大家交流。」

早前又舉辦首次網聚，同一班網友齊齊整烏冬

大人小朋友都玩得非常盡興