禍不單行丨劉謙團隊集體食物中毒 杭州演出延期 彈鋼琴補償觀眾

現年48歲嘅魔術師劉謙，上月剛爆出佢2月完成肺腺癌嘅治療手術，1號又爆出佢嘅演出團隊集體食物中毒，令原本8月31號嘅杭州演出，要延期至9月2號。

劉謙向觀眾交代情況。
正於內地進行巡演嘅劉謙，原定喺31號舉行杭州站演出，無奈觀眾去到現場先被通知演出取消。有觀眾就放出劉謙喺現場親自上台解釋嘅影片，當中劉謙表示係隨行嘅廿多名工作人員，於前一晚集體食物中毒，由於大部機工作人員仍未康復，為免影響演出質量，所以臨時決定將演出延期至9月2號，觀眾亦可以選擇退票。而為咗補償到場嘅觀眾，劉謙更即席演奏一曲鋼琴曲。

疑似團隊成員接受治療照片。
事後喺微博亦有唔少人轉發出疑似係劉謙團隊喺醫院吊鹽水嘅相片，相中眾人癱坐喺櫈上面，似乎相當辛苦。而杭州西湖區官方亦發出初步調查報告，指31號上午，浙江醫院三墩院區陸續接診18例腹瀉病例，眾人均為某演出團隊成員，而經過門診治療後已全數自行離院。調查報告中指相關單位已對有關餐廳嘅食品衛生進行調查，亦抽取多個樣本送往實驗室檢測，至於該涉事餐廳已暫停營業。

杭州西湖區官方亦發出初步調查報告。