梁洛施學識放手努力投入工作 林盛斌嘆家中存在感低

梁洛施（Isabella）啱啱拍完電影，呢日又出動搵真銀為一個品牌擔任代言人，Isabella三個阿仔都開咗學，喺湊仔方面都學識放手，加上Isabella獲得阿仔支持繼續演藝工作，而家自己有更多時間可以投入工作。

梁洛施呢日出動搵真銀。

Isabella透露目前傾緊幾套戲，佢認為最重要係劇本好、團隊好，而Isabella明白仔大仔世界，不過講到拍拖呢個話題，Isabella就唔主張阿仔過早拍拖，希望阿仔先專注學業，好好享受讀書階段。

Isabella話三個囝囝都好支持佢嘅演藝事業。

同場仲有林盛斌（Bob）早前出發去澳洲北領地拍攝台慶特備節目，雖然要同家人分隔兩地頗長嘅時間，但阿Bob心淡話喺仔女心目中冇乜存在感，而仔女早排去咗加拿大旅行，阿Bob指仔女喺加拿大買咗一條44吋腰嘅底褲畀佢作為手信，阿Bob笑言唔啱size，自己得36、37吋腰，見到呢個手信覺得鬆鬆地幾得意。

阿Bob呻自己喺屋企嘅地位低。