獨家丨李佳與歌迷舉行粉絲聚會 大玩廚藝比賽提早慶中秋

中秋在即，《中年好聲音》歌手李佳適逢佳節前夕，日前就聯同一眾歌迷齊齊提前慶祝佳節！ 上年佳佳就同大家一齊手作月餅，而今次粉絲團繼續搞搞新意，首次舉辦廚藝比賽。目的係希望粉絲團隊隊員發揮合作精神，就同佢地嘅粉絲名「一佳人」一樣，一家人團團圓圓，齊心創作迎合中秋佳節嘅菜式同大家分享。

今次粉絲團繼續搞搞新意，首次舉辦廚藝比賽。
而喺佳佳嘅粉絲群中都有唔少廚藝高手，從菜式設計至預備食材，都極具大廚風範，比賽隊伍各具實力，難分高下！ 賽後，佳佳亦同粉絲們喺佢嘅工作室舉行迎中秋佳人共聚晚會。佳佳嘅丈夫Sunny更親身安排佈置場地，掛上傳統文化紙燈籠，令大家有一個「回家的感覺」！

李佳老公Sunny亦有陪伴出席。

歌迷又親手預備美點分享，佳佳除咗同大家玩傳統遊戲「猜燈謎」之外，亦都獻上多首中西名曲，令樂迷大飽耳福。 最後佳佳就向廚藝出眾嘅隊伍頒發優勝獎項，大家其樂融融。呢個粉絲聚會就好似家人團聚，人月兩團圓，喺佳佳嘅歌聲中，每一位都沉浸於溫馨愉快嘅迎中秋之夜！

齊心創作迎合中秋佳節嘅菜式同大家分享。歌迷又親手預備美點分享！佳佳亦同粉絲們喺佢嘅工作室舉行迎中秋佳人共聚晚會。