林峯澳門開騷搵兄弟吳卓羲打頭陣 佘詩曼驚喜擔任嘉賓罕開金口獻唱

林峯5場澳門演唱會上周六開鑼，一向圈中人緣極佳，先係搵好兄弟吳卓羲做嘉賓，唱《別怪她》及《紅蝴蝶》勾起集體回憶，噚日更有Man姐佘詩曼駕到，罕有大開金口唱《愛在記憶中找你》、《唯獨你是不可取替》，阿佘出場前坦言好緊張，笑稱返去演戲算啦！雖然講係咁講，不過有阿峯傍住，阿佘又點會真係怯場吖！
林峯澳門演唱會首場，搵好兄弟吳卓羲做嘉賓。
阿峯噚晚演唱會邀「女朋友」佘詩曼擔任嘉賓，阿佘罕有為阿峯喺台上大開金口，觀眾見阿佘出場即尖叫聲不絕。 阿峯與阿佘多次喺劇中飾演情侶，二人早已默契十足，二人先合唱《愛在記憶中找你》，而阿佘就獨唱鄭秀文（Sammi）經典歌《唯獨你是不可取替》，唱完大笑咁講：「嚇死我喇就嚟！」

林峯澳門演唱會第二場，搵Man姐佘詩曼駕到，罕有大開金口。

阿佘直言緊張咗全日，今次係為阿峯先企喺舞台唱歌，阿峯亦細心為阿佘整理耳機，阿佘笑指本來以為只係合唱歌，原來阿峯仲想佢唱多一首歌，而當晚阿佘好姊妹梁靖琪、姚樂怡及周家蔚有到場睇騷支持。

佘詩曼被林峯誠意打動。