哥哥冥誕丨唐鶴德借生日相緬懷摯愛張國榮劉培基珍藏皮褲憶故友情

哥哥，生日快樂! 今日（12號）係哥哥張國榮68歲冥誕，一如過去七年，哥哥摯愛唐鶴德喺踏入9月12號凌晨零時就喺社交平台分享哥哥生前生日相，今年亦係第八張生日相，就係哥哥享受全場為佢獻唱生日歌而甜笑望住蛋糕嘅側面相，唐唐寫上「分享一張生日照愛『哥哥』的我們一起祝他生日快樂」。

哥哥摯愛唐鶴德喺踏入9月12號凌晨零時就喺社交平台分享哥哥生前生日相。
與哥哥份屬好友兼曾為哥哥演唱會擔任形象顧問及設計師嘅劉培基，亦喺社交平台緬懷哥哥，Eddie分享哥哥、梅姐梅艷芳，以及自己嘅相片，而幾張相都有一個共同點，就係三人着住同一件皮褸，Eddie帖文寫上「那年我在巴黎買的一件皮衣，他在頒獎典禮上穿上，她在電視演出穿上，我在不同的場合穿上，我想這是在80年代唯一一件衣服我們三個都穿過。今天把這件珍藏的皮衣穿上，唉，40年了，一份濃濃的愛意，一切我都保存著，相遇的意義在於照亮彼此」。呢件跨年代嘅皮褲，充份證明着三人嘅深厚友情。

哥哥曾喺頒獎典禮上穿上皮衣。

梅姐梅艷芳亦曾穿同一件皮衣在電視演出。這是在80年代唯一一件衣服他們三個都穿過。
另外，陳太陳淑芬同囝囝陳家豪亦到大圍拜祭哥哥，佢哋帶同哥哥鍾意嘅嘢食，陳太仲特製咗一個精美嘅Leslie Café蛋糕，同哥哥講喺早前澳門紀念展中，為哥哥兌現咗當年承諾，向持有《張國榮告別樂壇演唱會》門票嘅「哥」迷送上免費咖啡。現場除咗香港「哥」迷，仲有嚟自世界各地「哥」迷送上不同心意禮物，包括日本「哥」迷嘅千羽鶴，北京「哥」迷仲特別送上一套以「哥哥」生日(1956912)為號碼嘅珍藏紙幣。陳太亦應「哥」迷願望，盡力喺哥哥70歲冥誕舉行紀念活動。