企業強人丨張曦雯化身「風頭女王」好勝贏陳豪 女強人龔嘉欣由低層變CEO

由TVB與騰訊視頻合作出品嘅劇集《企業強人》，將於9月16號強勢登場，呢日台前幕後齊集宣傳造勢，金牌監製羅永賢（Marco）聯同主要演員陳豪、譚俊彥、龔嘉欣、張曦雯、姜大衞等，佢哋一齊現身記招宣傳。

《企業強人》將於9月16號強勢登場。

陳豪今次飾演物流公司主席趙愷，龔嘉欣就難得演女強人，佢個角色由快遞小妹方芳由低層爬起，最尾變成CEO，龔嘉欣一開始接呢呢個角色有啲擔心，因為自己身形細粒，成日要墊箱，令身高差距唔好太大。

龔嘉欣

陳豪笑言國語對白無難度，龔嘉欣指呢幕有驚喜，陳豪又讚《強人》系列劇本既有內涵又感動，畀演員空間好大，陳豪拍足3套《強人》系列，而張曦雯就拍足5套。

龔嘉欣、張曦雯、陳豪、譚俊彥。

張曦雯呢次同譚俊彥喺劇中嘅角色同真人好大反差，二人過足戲癮，譚俊彥飾演冷血又貪錢嘅徐道明，而張曦雯就飾演有野心又好勝嘅宋翹，呢次張曦雯化身風頭女王，每次都想贏前夫趙愷；而姜大衞呢次要演商界老狐狸，佢大讚劇本寫得好好，開拍前讀劇本都毛管戙。
張曦雯喺劇中飾演有野心又好勝嘅宋翹。