玖壹壹開騷慶祝成軍15周年 健志低調完婚雙喜臨門

台灣組合 玖壹壹 為慶祝成軍15周年，將以音樂節形式一連兩日開騷，除咗邀請其他歌手同組合助陣，音樂節仲設有攤位，大家聽歌睇騷之餘，仲可以飲飲食食，淨係想像都覺得好chill下。

台灣組合 玖壹壹 成軍15周年。
除咗即將開騷，玖壹壹最近仲有另一件喜事，就係成員健志日前同女友Mia低調簽紙結婚，而且仲係雙喜臨門，健志話幸福嚟得太突然，事關佢話太太一直有多囊性卵巢問題，本身係打算陪Mia抽完血就進行凍卵，點知無諗過咁快就有咗BB，令佢哋都覺得好驚喜。

而好兄弟春風同埋洋蔥都好戥健志開心，佢哋仲做埋健志嘅結婚證婚人添，為咗答謝兩兄弟嘅幫忙，健志話佢都請咗兩位食咗餐好貴嘅飯喎。
成員健志日前同女友Mia低調簽紙結婚。
即將升呢做爸爸，健志話會儘量平衡工作同家庭，希望可以有多啲時間陪小朋友成長，見到健志步入另一個階段，春風同洋蔥就未有太羨慕，只係話一切順其自然，而家主力都係先做好演唱會呀。